Desde aña pasa a inicia cu e proyecto aki cu ta dedica na drecha camindanan rond Aruba. Despues di cu pa hopi aña no a duna atencion den barionan, specialmente unda cu tin camindanan di santo, pa converti esakinan den camindanan di asfalt.
E Bario Babijn tin habitantenan cu pa mas cu 20 aña den e bario y e hecho cu aworaki ta drecha e caminda den e bario, ta trece un cambio grandi den e bida di personanan. Combersando cu habitantenan nan ta splica con nan ta biba cera den cas pa motibo di e cantidad di stof cu ta drenta nan cas si laga e cas habri y tambe cu tin muchanan cu ta bira malo continuamente door di e stof cu tin.
Minister di Desaroyo Teritorial, Infrastructura y Medio Ambiente Minister Otmar Oduber ta splica cu Gobierno di Aruba a traves di e maneho di Ministerio a percura pa pone e suma di 9 miyon florin pa aña disponibel pa infrastructura di camindanan. Tur siman DOW ta den diferente bario preparando of cambiando camindanan di tera pa camindanan di asfalt. Segun Minister Oduber ta splica 70% di e presupuesto ta dedica pa haci esaki y 30% pa cuminsa duna atencion na camindanan grandi principal cu pa varios aña no a haya mantencion necesario cual lo bira problema den futuro. ‘Comunidad mes por tuma nota di nos caminanan cu tin hopi kraak cual dentro di poco lo sigui bira mas grandi te cu nan bira buraco cual ta insigur y lo hacie fastioso pa maneha riba nan.’ Minister Oduber a sigui splica cu e 9 miyon florin no ta suficiente si mira e deficit cu tin pa caminda na Aruba, pesey e enfasis aworaki ta riba camindanan di santo pa converti esakinan den camindanan di asfalt pero pronto lo mester bay inverti den camindanan principal tambe cu durante di ultimo 10 – 15 añanan no a percura pa inverti den nan. Pues eorey lo mester bay percura pa tin recursonan necesario pa aumenta e presupuesto pa asfaltamento, drechamento y mantencion di camindanan.
Pa finalisa Marlon Croes Director di DOW a agrega bisando cu enberdad tur siman DOW ta den un bario diferente a base di planificacion cu tin pa drecha camindanan cu ta di santo tur rond di Aruba. Esaki primordialmente pa mehora e calidad di bida di habitantenan. E siman aki trabounan ta tumando luga na Babijn y otro siman ta Marawiel.