Home » EMAN TA GRADICI Y FELICITA RUTTE

EMAN TA GRADICI Y FELICITA RUTTE

by Admin
0 comment 109 views

Awe Mr. Mike Eman, ex-Minister-President di Aruba y actual lider di partido di Pueblo Arubano (AVP), a manda un caluroso carta personal pa Minister-President Mark Rutte pa gradicié pa e colaboracion durante tur e añanan y pa felicit’é cu su nombracion como Secretario-General di NATO. Den su carta, Mr. Eman a enfatisá tanto e ciere importante di e término di servicio publico impreshonante di Rutte como Minister-President di Hulanda como su rol nobo y prestigioso den NATO.
Mr. Eman: “Ora mi a yega na final di mi término como Minister President di Aruba, mi a ricibí di bo un bunita carta di agradecimento pa loke nos a logra hunto den representacion di nos Reino. Mi tambe tin recuerdonan special di e estrategia cu nos a desaroyá pa pone Aruba hunto cu e Reino riba e plataforma internacional como un ehèmpel y lider den sostenibilidad.”
Mr. Eman tambe a expresá su agradecimento di curason y aprecio pa e colaboracion y e relacion personal cu nan a desaroyá durante nan término di oficio. E a recordá e colaboracion balioso entre Aruba y Hulanda, y e esfuezo hunto pa pone Aruba y Hulanda riba e plataforma internacional como un lider den sostenibilidad. E tambe a recordá e esfuezo conhunto pa logra pa e asiento pa Reino den e Conseho di Seguridad di Nacionnan Uni y e tantisimo representacionnan intensivo internacional exitoso.
Un momento particular den e carta tabata e recuerdo di e momentonan informal despues di un dia largo di trabou, unda nan ta comparti un cerbez riba trapi di un residencia di un embahador evaluando e dia. E momentonan aki a profundisa nos relacion pa sirbi nos paisnan, Eman ta enfatisa.
Mr. Eman: “E portret di nos actuacion hunto na e Cumbre di las Américas, cu mi a regalá na bo durante mi ultimo bishita, mi ta spera lo haña un bon lugar den Bo oficina di NATO, como un recordatorio cu e proteccion di e integridad teritorial di nos islanan tambe lo keda den bo atencion”.
Mr. Eman a expresa su confiansa ku Mark Rutte lo desplega su rol nobo como Secretario-General di NATO cu mesun dedicacion como su rol como Minister-President.
Na final di su carta personal, Mr. Eman a invitá Mark Rutte pa continua bishitá Aruba y ta spera cu nan caminda lo crusa otro di nobo den futuro. E a exspresá su respet di curason y admiracion pa tur loke Mark Rutte a logra como Minister-President y pa e contribushon futuro cu e lo duna na comunidad internacional.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio