ORANJESTAD, Aruba – A bin haya sa cu di Aruba tabata transporta oro procedente for di Venezuela pa Europa y despues esaki tabata bay pa otro partinan di mundo. Tur cos tabata keto y algun luna atras a detene un persona aki na Aruba. E persona aki ta Toro Rodriguez, bodyguard di Minister President Wever-Croes. E tempo aya Minister President a crea e impresion, mescos cu el a haci na varios otro ocasion, di no conoc‘e.
A publica diferente potret di Minister President cu e sospechoso aki, despues a resulta cu e persona aki ta bodyguard di su persona. E tema di oro, traficacion di oro ilicito for di Venezuela a capta atencion un biaha mas despues di un publicacion y investigacionnan basta profundo. Esaki a mustra riba e echo cu e forma con ta opera e transporte di oro aki ta un forma conoci pa pais Venezuela y nan ta haci mal uzo di nos teritorio cu cooperacion di hendenan na Aruba mes.
E ta hopi lamentabel pero e parti mas lamentabel ta cu Minister Presidente, Evelyn Wever-Croes, tin hendenan rond di dje ta coopera cu esaki. E parti mahos di tur esaki ta cu na momento e gobierno Venezolano a purba di daña nomber di Aruba, a purba di duna e impresion cu pais Aruba y Corsou lo ta esun bezig ta coopera pa saca cosnan di nan pais y perhudica nan, segun Parlamentario di Fraccion di AVP, mr. drs. Arthur Dowers.
Evelyn Wever-Croes ta esun cu a brasa Gobierno Venezolano, a brasa Maduro y su hendenan y a core bisa cu si ta berdad cu ta falta di e gobierno anterior. Despues a bin resultado cu e gobierno anterior no tabatin nada ke haber cun’e, sino hendenan yega na Evelyn Wever-Croes ta esunnan cu ta ocupa nan mes cu transporte di e productonan aki.
Fraccion di AVP a compronde cu e compania di Rodriguez ta pa oro, cual ta pa transporta oro for di Venezuela. E compania aki ta registra na Arulex Building unda ta e oficina di Evelyn Wever-Croes. E ta bodyguard di Evelyn Wever-Croes y e no por bisa di no tabata sa di e transporte ilicito aki. Tambe tin indicacion cu mas persona, hasta ambtenaar, tabata envolvi den e transporte di oro cu e persona aki. Tur e personanan aki tambe ta liga na partido MEP y na e Minister President. Parlamentario Dowers kier sa cu ora esaki tuma luga, con e tin curashi di sali pafo y daña nomber di bo pais, siendo si a puntra esunnan cerca di bo cu ta haci e transporte di oro aki y si bo a puntra cualkier otro persona cu tin un poco tino con e situacion na Venezuela ta funciona nan lo splica bo bon bon cu ta hendenan yega na e gobierno.
Ta e gobierno mes ta esun cu tabata organisa transporte di oro aki y no mester a bay daña nomber di pais Aruba. Bo no mester a lastra nos pais manera bo a lastra nos gobierno anterior. “Bo a bin haci comosifuera cu nos tabata coopera cu algo cu no ta cuadra, siendo cu e gobierno actual di Venezuela hunto cu bo hendenan ta esunnan cu tabata ocupa nan mes cu transporte oro.”
Den e documento di Douane ta poni e nomber di esun cu ta transporta e oro ta Aruba Security Academy y con ta posibel cu un compania tambe registra na Arulex Building, cu a cera na 2004, su nomber ta riba e facturanan cu ta transporta e oro aki. Kico mas tin ey tras, pasobra esun cu ta haci esey ta Rodriguez pa oro. Ta uzando un compania registra na oficina di Evelyn Wever-Croes y no ta existi mas pa transporta oro. Nan kier a camufla cierto cosnan y ta spera cu e investigacion aki por sigui pa asina haya un indicacion mas profundo ken mas ta meti. Fraccion di AVP tin indicacion cu tin mas hende cu tabata ocupa cu transporte di oro. E pregunta ta e ora ey kico nan a gana di esaki, kico tabata e probecho di esaki. Ta importante pa sa si nan ta haci mal uzo di nan posicion y funcion como ambtenaar pa yuda facilita e transportacion di oro.
E informacionnan cu e Fraccion di AVP ta hendenan di MEP rond di e oficina di Minister Presidente. A pasa 1 aña caba y ta spera cu Ministerio Publico por duna un claridad riba esaki, pero tambe ta spera cu no ta investiga solamente e bodyguard di Evelyn Wever-Croes. Tambe pa investiga e otronan cu ta menciona y envolvi den traficacion di oro, facilita esunnan na Venezuela cu tabata liga na Gobierno pa por saca oro di eynan. A saca excusa pa ataca nos pais y lamentablemente e Minister President di Aruba cu mester a scoge pa para banda di e pueblo di Aruba, a scoge pa para banda di un grupo di hende cu tabata ocupa nan mes pa daña nos imagen. Por mira den tur publicacion prueba cu tabata ocupa nan mes cu traficacion di productonan ilicito for di pais Venezuela. Parlamentario Dowers ta haya cu esaki ta un traicion contra e pueblo di Aruba.