Noord – Dialuna mainta trempan polis ta haya un yamada di un pareha, cu lo a keda pega den lift di edificio di MFA na Noord.
E pareha lo tawata tin un afspraak cierto ora den MFA, y na nan yegada nan a tuma e lift pa bay ariba.
A drenta e lift, y aki ta caminda e situacion fastioso a cuminsa.
Despues di a primi e boton pa e piso, esaki no a subi. Ora e pareha e primi pa e porta habri esaki tampoco kier a habri. Segun nos a compronde, nan lo a trata na yama y grita pa wak si un hende por scucha nan pero nada.
No a keda nada otro pa a yama polis, cu lo a yega den algun minuut y a avisa personal di siguridad cu tin hende pega den e lift.
Mesora a cuminsa mobilisa pa haya e yabi di e lift pa habri esaki.
Mientrastanto e agentenan tawata comunica cu e pareha y tawata splicanan kiko ta pasando. Di e manera ey tratando pa tenenan trankil.
Despues cu a logra habri e lift, e personanan a sali y por bisa cu nan tawata trankil door cu polisnan tawata constantemente den contacto cu nan.
Despues di e incidente, nan a bay caba di haci loke nan a bin haci.