ORANJESTAD – Awe e delegacion Aruba encabeza pa Minister di Finansa, Asuntonan Economico y Cultura Sra. mr. Xiomara Ruiz-Maduro a yega Colombia pa asina cuminsa cu nan participacion na e Mision Economico di Reino Hulandes. E programa aki ta un iniciativa di Rijksdienst voor Ondernemend Nederland. Demas delegacionnan di reino cu ta na Colombia ta esun di Hulanda encabeza pa Minister President Mark Rutte, e delegacion di Corsou encabeza pa Minister di Desaroyo Economico Steven Martina hunto cu participacion di mas di 100 empresario di Aruba, Corsou y Hulanda. Reino Hulandes ta na Colombia buscando oportunidad den diferente sector e.o. agricultura, logistica, infrastructura, salud, transporte y horticultura.
Minister Ruiz-Maduro durante su biahe di trabao na Colombia lo reuni cu autoridadnan di Colombia, cu ATA Colombia y lo tin varios otro temanan riba e agenda pa trata na duna inicio na desaroyo y capacitacion di conocimento agricola stimulando mas produccion local y sondea e posibilidadnan pa desaroya turismo medico,
cooperacion pa desaroya e industria creativo y programa di cooperacion pa fortalece nos capacidad empresarial y innovativo.
Ademas e mandatario lo promove Aruba su “Promising Sectors” pa asina atrae inversionnan cu por apoya e desaroyo economico na Aruba. Banda di e agenda di Minister Ruiz-Maduro tambe lo tin diferente reunionnan hunto cu Promer Minister Rutte di Hulanda y Minister di Desaroyo Economico di Corsow, Steven Martina.
