WASHINGTON – Prome Minister Evelyn Wever-Croes dialuna ultimo tabata na Washington y a reuni cu director ehecutivo di IMF sr. De Lannooy y sr. Doornbosch. A repasa e proyectonan cu IMF ta asistiendo Aruba den dje.
COMPLIANCE
No ta un secreto cu tin basta placa di belasting cu no ta wordo paga ni cobra manera mester ta. Compliance of cumplimento cu debernan di belasting ta abou. Aki no ta papiando di pensionadonan of di clase trahador. Mas bien ta trata companianan y esnan cu ta gana hopi placa y ta manda nan placa pa exterior sin paga belasting riba dje. IMF lo ta na januari na Aruba pa asisti Aruba den esaki.
GASTO DI PERSONAL
Gasto di personal ta forma 19% di nos presupuesto total, cual ta un parti considerable. Gobierno di Aruba ta luchando pa baha e gasto aki sin tin cu recuri na retiro masal di trahadonan publico. Ya gobierno a desaroya 7 instrumento cu cual ta manehando e gastonan y cu a percura pa den 2019 e gastonan di personal ta baha cu 6 miyon florin. Cu asistencia di IMF lo desaroya mas instrumento pa monitoria e proyeccionnan pa sigui maneha e gastonan aki miho.
REFORMA FISCAL
IMF tabata satisfecho di tende cu Gobierno di Aruba a aprecia e rapport di IMF y e consehonan di IMF pa cu Reforma Fiscal. Gobierno di Aruba a dicidi di sigui mayoria di e recomendacionnan, den varios fase. E prome fase cu lo ta den efecto pa comienso di otro aña ta e rebaho di belastingnan personal y riba propiedad, cu ta duna alivio na e clase trahado y pensionadonan.
Fase dos lo ta trata e belastingnan indirecto, BBO y invoerrechten.
Fase tres lo trata e belastingnan comercial, winstbelasting y dividendbelasting.
Y fase cuatro lo trata e belastingnan cu turistanan ta paga.
Prome Minister Evelyn Wever-Croes: “E reunionnan a bay bon y por nota cu Aruba ta ganando confiansa bek cerca e institutonan financiero internacional. Despues di mira e mal maneho financiero di ultimo 8 añanan, nan tambe ta mustra awor e confiansa bek den maneho di Gabinete Wever-Croes”.