Dialuna atardi a tuma lugar un ceremonia den Santana di Santa Cruz, caminda a conmemora e di 32 aña di fayecimento di e lider inmortal di e pueblo Arubano, Betico Croes. Na e ocasion aki y despues cu tur presente a canta e himno di Aruba, ofrendanan floral a ser haci pa sra. Xiomara Ruiz-Maduro y sr. Ady Thijsen na nomber di e partido cu Betico Croes a funda, esta MEP, pa sr. Maikito Croes y sr. Hendrik Croes na nomber di Fundacion Betico Croes y finalmente door di sr. Glenbert Croes y e hobencita Franchesca Saladin na nomber di yiunan y famia di Betico Croes. A sigui despues cu discursonan di sra. Xiomara Ruiz-Maduro, sr. Maikito Croes y sr. Hendrik Croes, kendenan tur a elabora riba e bida y lucha di nos Libertador, kico e gran luchador aki a significa pa pais Aruba y pa awe nos ta un pais autonomo den Reino Hulandes. Finalmente a sigui un Santo Sacrificio di misa caminda a resa pa descanso di alma di e gran estadista aki.