Tabata riba diabierna 17 di november 2017 cu Minister Glenbert Croes a huramenta como Minister di Asunto Social y Labor. Su prome dia oficial di trabou tabata dialuna dia 20. Ya pa 24 di november Aruba a keda sacudi y atormenta cu e morto di Rishandroh, sin conta e dianan di angustia cu a sigui despues cu e buskeda di Roshandrick cu tambe lastimamente tabatin un final sumamente tristo.
E mandatario no kier en absoluto pa Aruba lubida e fayecimento di dos criaturnan, tampoco e revuelto cu nan morto a ocasiona, ni pa nan final tristo ta envano.
Di nan morto a nace locual awe Aruba conoce como e Crisis Plan Social cu tin como meta atende di un forma firme cu nos problemanan social na tur nivel, den tur grado.
Pa e motibo ey tambe cu e recien acuerdo entre e Gobierno di Aruba y Unicef ta di vital importancia pa por yega na e solucionnan real pa proteccion di tur nos criaturanan.
E resultado alomejor e propio Mandatario hamas lo mir’e. Pero, nos sa si cu el a cuminsa na November di 2017 na bienestar di nos futuro generacionnan.
Pa cu esaki Minister Glenbert Croes den representacion di Gobierno di Aruba lo tin un Ceremonia Solem na memoria di e dos Angelitonan. E acto lo ser efectua diahuebs dia 29 di november riba e pleintje banda di Makro na San Nicolas for di unda e caminata na nan memoria a sali.
E programa pa e ocasion aki ta como lo siguiente:
8AM Apertura
8.05AM Himno di Aruba canta pa Sharon Rose
8.10AM Palabranan di Minister Glenbert Croes
8.20AM Acto simmbolico na memoria di Rishandroh y Roshandrick
8.35AM Bendicion y oracion
8.40AM Un minuut di silencio
8.41AM Clausura
Cu esaki nos kier logra pa tur hende semper recorda e dos rumannan aki.