Parlamentario Endy Croes a reacciona riba un articulo recien di Richard Arends Parlamentario di AVP kende a publica un articulo bou di e titulo “ Kiebro den e ciclo di cuenta anual ta un señal robes”.
Diaranson ultimo Parlamento di Aruba a trata e exploitatie rekening di aña 2016 y esaki a wordo desaproba pa Parlamento mientras mas cu claro 7 parlamentario di AVP kendenan tabata presente a vota “voor” pa aproba esaki pero a keda den minoria y no a logra den nan intento. Esnan cu a causa e desaster den maneho mes manera Benny Sevinger y Mike de Meza no a ni yega trabao pa responsabilisa nan mes di e caos cu nan a laga atras. Banda di tur esaki tin rapport di Controlaria General (Aruba Rekenkamer) di cuenta anual 2016 unda nan a desbarata e maneho di Mike Eman y su gobierno. No obstante di a bay Parlamento pidi casi 40 miyon extra y a haña esaki aproba den un suppletoire begroting pa gastonan cu Ministernan a gasta sin autorisacion, na final di cuenta ainda nan a surpasa cu un otro 10 miyon extra. Rapport ta mustra cu e actonan di e ministernan ta “ONRECHTMATIG” . Artikel 31 di ley di Comptabilidad ta splica claramente cu por tene e Ministernan encuestion personalmente responsabel. Mas cu claro un Parlamento responsabel no por a aproba e desaster cu Mike Eman y AVP a ocasiona pa cu aña 2016. Alrespecto esaki cu asombro por tuma nota di Richard Arends cu a yama esaki un señal robes. Nos por compronde cu Richard Arends tambe a forma parti di e fiesta y ta p’esey e ta pura pa Parlamento aproba e desaster cu nan a causa y asina libera nan tur pa no ta personalmente responsabel mas. Mas tristo ta momento cu nos a tira un bista por ehempel na RDA por a tuma nota cu e compania HORIZON di Richard Arends a strica eyden un suma di 450 mil florin, pues casi mey MIYON y den Utilities un otro suma di 574 mil cual hunto ta surpasa 1 MIYON florin. Banda di esaki Richard Arends su compania tabata duna conseho na Mike Eman y den ultimo añanan a strica otro 2 MIYON florin mas. E cas grandi na Malmok no a cay for di shelo toch? Pues awe Richard Arends kier bin hunga mas santo cu papa di Roma y asina purba gana simpatia di nos pueblo. Parlamentario Endy Croes a splica cu no lo laga nada pasa y un pa un lo bin pa tur. Awor kisas pueblo por compronde e angustia di Richard Arends y AVP pa aproba exploitatie rekening di 2016. Fiesta a caba y pueblo por ta sigur cu den 2018 e compania HORIZON di Richard Arends no a cobra nada mas for di e gobierno aki, RDA of Utilities. Placa ta yega su destinacion corecto awor y no den saco di amigo y colega sin mas, Endy Croes ta termina bisando y contestando e Parlamentario di AVP.