Minister di Asuntonan Social y Labor a tuma nota di informacion cu hopi tinte politico cu a bin den medionan di comunicacion cu no ta duna un bista real di tur e esfuersonan cu a ser encamina a base di e vision y maneho di Gabinete Evelyn Wever-Croes y Minister di Asuntonan Social y Labor, Sr. Glenbert Croes.
Ta lamenta cu un Parlamentario cu ta bin di e tereno social ta opta pa hunga wega politico cu algo asina importante manera e crisis social. Netamente e mes negligencia di Sra Mervin Wyatt Ras y su Partido AVP, a haci cu awe e trabounan pa alivia e crisis social cu ta existi aki na Aruba, ta mucho mas grandi.
Pa 8 aña e Departamento di Asuntonan Social a worde poni un banda pa e Gobierno di AVP di cual Sra. Wyatt Ras tabata hasta presidi e Parlamento di Pais Aruba. Mare cu por tabatin maske ta un biaha cu Sra Wyatt Ras por a lanta un dede pa hala atencion di su partido AVP cu tabata na mando pa 8 aña.
Awe Minister Glenbert Croes conhuntamente cu e departamento ta trahando duro pa pone tur cos bek ariba pia. Lo ta cu Sra Wyatt Ras a tuma nota di e progreso den e tareanan di e plan di crisis social, cual mester ta molestia Sra Wyatt Ras pasobra cu e ta resalta su propio incapacidad di 8 aña largo. Sigur tambe ta di lamenta pasobra den 8 aña, nunca el a preocupa ni cu e departamento y corda cu tur esunnan afecta den e crisis social. Es mas, ora cu e Departamento a bati alarma na 2017, ta su propio Gobierno a duna instruccion pa no haci e cifranan publico.
Awe por tuma nota di un departamento ubica den un edificio den completo deterioro, sistema di computer cu cada bes ta cay afo y Sra Wyatt Ras nunca a puntra su mes con e negligencia aki ta afecta tur esunnan cu ta labora cu alma y pasion den e departamento ey ni con e falta di accion di parti di Sra Wyatt Ras a contribui na casonan lamentable cu Aruba a conoce den e ultimo añanan?
Awe por papia di maneho di un gobierno cu no solamente a papia, pero tambe a pone 17 miyon florin disponibel pa cuminsa alivia e situacion cu esunnan mas vulnerabel ta victima di dje. E fondonan aki a worde basa ariba un plan cual ta inclui no solamente conscientisacion di e comunidad riba e problematicanan aki manera ta recomenda pa rapport di Unicef, pero mas importante ta e tarea di trece un coordinacion mas estrecho entre tur e partnernan den e tereno social, esta e diferente departamentonan di gobierno, pero tambe e fundacionnan. E trabou di alineacion entre tur e partnernan pa crea un sinergia pa e esfuersonan ta mas efectivo y eficiente. Gran parti di e fondonan asigna na e crisis social ta pa duna e partnernan e recursonan pa intensifica nan actividadnan.
Parti di e tareanan tambe ta pa implementa un sistema central di registracion di e casonan pa asina cada caso por cana su caminda di forma rapido y e victimanan por haya e alivio y of sosten necesario.
Finalmente ta invita Sra Wyatt Ras pa ta parti di e solucion y cu e comunidad lo sa di reconoce accionnan genuino pa yuda alivia e situacio y no manera Sra Wyatt Ras ta purba di hunga cu sentimentonan di nos comunidad y victimanan pa asina purba score punto politico. Si no kier yuda anto para un banda y observa un Gobierno berdaderamente purba yuda e mucha, e hoben, e grandi cu ta den necesidad y cu mester di un solucion, un ayudo, un apoyo.
Aruba