Gobierno a entrega Presupuesto 2019 y awo ta wardando e fecha cu esaki lo wordo trata den Parlamento. Prome Minister Evelyn Wever-Croes a elabora riba e presupuesto di su Ministerio esta Ministerio di Asuntonan General dunado asina informacionnan adelanta na pueblo.
Prome Minister a duna di conoce cu apesar di tawata un ehercicio dificil, a logra baha gasto di Ministerio di Asuntonan General incluyendo tur departamento cu ta resorta bou di e ministerio aki cu un alrededor di 3 miyon florin. Di otro banda e gastonan di e asina yama “Overtolligheidspoel” di 5 miyon a wordo poni e aña aki bou di Ministerio di Asuntonan General pa asina Prome Minister mes atende cu e fenomeno aki. Prome Minister a anuncia cu den 2019 lo soluciona e problema aki. Esnan cu ta den e “poel” ey sea mester bai trahe bek of ta termina nan relacion di trabou, pasobra Gobierno simplemente no por carga e peso aki mas.
Gasto di salario y personal di Oficina di Minister di Asuntonan General a baha. Premier Wever-Croes ta trahando cu un staff di 22 persona compara cu 147 persona cu ex Prome Minister Eman te ultimo ainda tawata traha cu n’e. Esaki ta 125 hende menos cu ta 8.3 miyon florin menos.
Gastonan di biahamento, gasto di huur na edificionan, gastonan di lease di autonan y especialmente gastonan di propaganda y promocion a baha cu 862 mil florin menos compara cu e ex Prome Minister tawata tin na e gastonan aki.
Prome Minister Evelyn Wever-Croes: “Hunto, mi oficina, mi ministerio, cu ta inclui ami, mi secretaria, mi conseheronan y tur cu ta yuda mi den mi oficina, ta na 9 miyon florin menos cu e ex Prome Minister di AVP. E no ta facil. Tin hopi menos hende y e trabou mester a wordo parti den menos hende cu ta haci e trabou hopi mas dificil. Pero mi ta hopi satisfecho cu e sosten cu mi ta haya di mi oficina”.
Prome Minister a indica cu e gastonan di oficina di tur e ministernan, apesar cu mester a amplia algun caminda pa motibo cu problemanan a bira mas grandi, den general toch esaki a keda igual cu na 2018. Esaki, segun Prome Mininster tawata un reto sumamente grandi mirando e trabounan grandi cu tawata tin. Gastonan di Ministerionan awo ta 17.3 miyon menos cu e gastonan di e ministernan di e Gobierno di AVP.