Den coneccion cu su tour di bishita na e diferente agricultornan local, Minister di Sector Primario, sr. Chris Romero, a pasa na e produccion piscicola ‘The Family Farm Aruba’, cu ta situa na Wayaca.
Piscicultura (fish farming) ta un otro area den agricultura cu ta fortaleciendo aki na Aruba. Minister Chris Romero tin hopi interes den piscicultura, cu ta e tecnica cu ta ocupa di dirigi y fomenta e reproduccion y cria di pisca y demas cuminda di laman.
‘The Family Farm’ ta un piscifactoria opera pa famia Bosch y ta situa den e bario di Sero Biento. Despues di a opera pa algun aña na Sint Maarten, pareha Bosch a dicidi di bin lanta nan produccion piscicola aki na Aruba. Teniendo na cuenta cu Aruba su ubicacion geografico ta haci cu e probabilidadnan pa haya un horcan ta hopi abou, famia Bosch a dicidi di bin construi nan ‘fish farm’ aki na nos isla. Experiencia amargo di pasado, unda cu horcan a destrui nan produccion piscicola, a incentiva mas ainda pa famia Bosch dicidi di construi nan ‘fish farm’ na Aruba e aña aki. Actualmente ‘The Family Farm’ tin un instalacion caminda nan ta produciendo pisca caba, cu e meta pa den un futuro sercano por produci pisca na un escala mas grandi pa asina cumpli cu e necesidad local.
Den e vision di Minister Romero pa Aruba yega na ta mas independiente pa loke ta cuminda, ta realisando diferente sondeo den e sector di agricultura local. Di e manera aki kier cuminsa incentiva nos agricultornan pa nan comercialisa nan producto na nivel local, y cu e pensamento di por yega na exporta den futuro.