Gabinete Wever-Croes siman pasa a pone algun paso mas den e rumbo di progreso y bienestar di nos pais. Cada paso sea grandi of chikito cu Gobierno di Aruba tuma ta solido y sigur y cu e meta pa logra cosnan grandi pa Aruba y pone Aruba riba e rumbo corecto.
- A cuminsa e siman cu “Aruba Money Week” a wordo organisa pa Banco Central pa haci muchanan consciente di e balor di traha pa nan placa, con pa gasta placa responsabelmente, con pa spaar e placa y con pa duna bek na comunidad. Na un forma innovativo a prepara e fundeshi di 800 alumno di 5e y 6e klas.
- Gobierno a anuncia cu e trabounan pa yega na haci Arubig un realidad ta andando; importante den e proceso aki ta pa nos garantisa e miho calidad di cuido pa nos hendenan atrabes di un instituto profesional di control di calidad di cuido.
- Gobierno a institui un linea di contacto y un ekipo special pa atende cu personanan cu problema mental y di adiccion. Famianan por yama na e punto di contacto y e FACT team ta sali mesora pa atende cu e caso.
- A finalisa construccion di varios caretera rond nos isla atendiendo asina cu e preocupacionnan di comunidad. Trabounan di reparacion ta sigui rond di Aruba mientras ta ricibiendo cantidad di peticion di ciudadanonan; esakinan tin e debido atencion di Gobierno.
- Trabounan a cuminsa pa proyecto di Boardwalk den e area di Malmok, pa e por bira un area mas atractivo. E boardwalk aki ta pa uzo di nos comunidad por haci ehercicio y tambe pa por garantisa siguridad di tur esnan cu lo haci uzo di dje.
- Gobierno a firma 3 acuerdo importante pa e relacion entre FCCA y Gobierno den cuadro di e plan social, cu e meta pa construi 200 cas social.
- Cifranan di Banco Central ta confirma crecemento economico nominal calcula pa Gobierno di Aruba na unda cu a tene cuenta cu crecemento nominal di 1% den presupuesto 2018 y Banco Central a ahusta esaki na 2.9%. Gabinete Wever-Croes ta aplica un maneho financiero hopi cauteloso.
- E PRESUPUESTO 2019 ta na caminda pa Parlamento den cua a reduci e deficit di 130 miyon pa 25 miyon y pa prome biaha ta logra baha gasto di personal cu 4 miyon florin. Den nos prome aña di gobernacion nos no a logra soluciona e problema completo cu a wordo crea durante 8 aña, pero nos a traha e fundeshi pa soluciona nos problemanan financiero y garantisa stabilidad financiero den futuro.
- Gobierno a cera e siman honrando Xander Bogaerts como embahador di bon boluntad pa nos pais den un celebracion na unda un publico grandi a topa Hunto cu Xander.
Aruba ta un pais bendiciona. Dos siman pasa nos a uni den exito di Jeon atrabes di su concierto. Siman pasa nos uni den e exito di Xander y e tremendo celebracion. Y ayera nos ta uni cu Davy, Romar, Deaxo, Stephan y Wendy, e 5 landadonan den ‘Crossing for Hope’. Ki orguyo, especialmente cu pa prome biaha un hende muher tambe a haci e hazaña aki.
Nan tur 7 ta prueba cu ora bo kere den bo mes, combina cu trabou duro y sosten di bo sernan keri, bo por logra tur cos!
Prome Minister Evelyn Wever-Croes: “Mi tin fe y confiansa cu e siman aki lo ta aun mas exitoso, cu logronan importante den bienestar di nos pais”.