Caminda cu por, Aruba ta purba di yuda
E crisis migratorio di Venezuela ta forma preocupacion grandi pa tanto e pueblo como pa Gobierno di Aruba. Pa esaki, siman pasa Prome Minister Evelyn Wever-Croes a atende reunionnan importante na Aruba y na Sint Maarten pa asina busca yudansa internacional di instancianan concerni. Venezuela ta pidiendo ayudo di mundo. Caminda cu por, Aruba ta purba di yuda. Sinembargo pa Gabinete Wever-Croes su prome responsabilidad ta pa crea oportunidadnan prome pa nos propio comunidad cu no ta exclui niun rasa ni nacion.
Aunke cu Gobierno di Aruba ta cumpli cu su responsabilidadnan y atende cu e efecto y impacto cu e crisis migratorio di Venezuela tin pa nos pais, e crisis migratorio aki primordialmente ta responsabilidad di Venezuela. Si Venezuela ta brinda su ciudadanonan suficiente perspectiva y oportunidad, nan no ta tuma e riesgo y pone nan bida na peliger.
Gobierno a tuma nota cu diputadonan di Estado Falcon di Venezuela ta bay haci reclamo pa Aruba y Corsou trata e refugiadonan cu ta hui di nan pais, na un forma mas humano. E mensahe cu Gobierno di Aruba ta manda pa e diputadonan aki ta cu e responsabilidad primordial ta di nan mes y no di Gobierno di Aruba. Un ciudadano cu ta haya trato humano na nan pais, no tin mester di crusa lama pa haya nan den un situacion asina.
Prome Minister ta remarca den reuda di prensa di Gobierno dialuna mainta, cu Venezuela mes no a cumpli cu e convenionan entre e islanan y Venezuela. Dia cu a habri frontera, a yega na convenionan comun. Un di e convenionan ta cu Venezuela lo no permiti pa balseronan sali mas di e pais pa bin e islanan. Venezuela a priminti cu nan lo controla su fronteranan miho. Esaki no ta socediendo. Y como resultado, Aruba ta haya e consecuencia di esaki cu ta un peso enorme pa un pais. Un dilema constante pasobra ta trata di bida di ser humano kendenan ta hui situacionnan inhumano.
Gobierno di Aruba kier yuda unda por. Pero Aruba mester na prome luga cumpli cu esnan riba e isla aki prome. Tin situacionnan hopi inhumano na Aruba caba na unda no por cumpli cu tur ciudadano. Diferente hende no por biba riba onderstand of pensioen di biehes solamente, hopi hende ta desemplea y no por haya trabou, incluyendo Venezolanonan cu ta riba nos isla caba. Esaki ta nos responsabilidad primario. Gobierno no por pone esakinan un banda pa asumi un responsabilidad cu primordialmente ta di Venezuela.
“Mi ta haci un apelacion na nos comunidad pa no bay den panico y na un nivel pa expresa rabia. Nos tur ta bin di famianan migrante y un dia tawata tin mester di un hende pa saca un brasa pa yuda nos. Na e momentonan aki, Venezuela ta pidiendo ayudo. Caminda cu por, nos ta purba di yuda. Naturalmente, nos responsabilidad ta cu e pueblo di Aruba prome pa crea oportunidadnan prome pa nos propio comunidad cu no ta exclui niun rasa ni nacion.
Mi ta spera cu locual cu a socode unda dos persona a perde nan bida, no ripiti. Esaki ta algo hopi doloroso pa nos tur. Pa e famianan especial kendenan a perde nan sernan keri. Un apelacion pa tur esnan cu pensa di busca nan familiarnan di e forma aki, pa nan pensa bon prome cu nan pone e bidanan aki na peliger”, Prome Minister a expresa durante conferenia di prensa di Gobierno dialuna mainta.