ORANJESTAD: Recientemente e hoben artista Jonathan Thiel mihor conoci como Jeon tabata parti di un paseo na varios scol ariba nos isla. E paseo aki tabata tin como meta principal pa comparti experiencianan y lesnan di bida di Jeon na nos hubentud escolar. Tambe a probecha pa asina invita e hubentud pa bin bira e espectaculo mas grandi cu Jeon a yega di duna Aruba durante ‘Island Takeover Festival”. E concierto aki lo tin presentacion di J Balvin, Bad Bunny, Alex Sensation y Jeon mes entre dia 1 pa 4 di November 2018 riba nos isla na Harbor Arena.
E scolnan cu a bishita tabata Juliana School, Maria College, Mon Plaisir College, Colegio San Antonio, EPB Oranjestad, SPO Santa Cruz y EPB San Nicolas. Jeon acompaña hunto cu algun otro amigo musico a conta su experiencia y lesnan di bida pa asina stimula e hobenan den nan trayecto escolar. Naturalmente algun tononan musical no a falta.
Jeon a conta cu e mes a sali for di scol na un edad hopi hoben y despues a arepenti esaki masha hopi. E ta sigi splica cu ta importante pa hobenan hasi tur nan esfuersonan durante e temporada di scol pa por preparanan pa un mihor futuro. Despues cu Jeon a ripara cu su decision no tabata esun mihor, e la drenta scol bek y a logra caba su scol pero na un edad mas halto cu un hoben cu si a sigi su trayecto di scol regular. Jeon a stimula e hobenan tambe pa kere den nan mes y ora cu nan haya un inspiracion den nan bida pa pusha pa por logre. Loke bo pone den bo mente y curason bo lo logre, tabata un di e mensahenan fuerte di Jeon.
Tanto e studiantenan como tambe e docentenan a aprecia cu Jeon a tuma su tempo pa asina papia cu e hobenan. Na varios scol den klas por a mira cu e hobenan tabata hopi entusiasma cu Jeon ta den nan klas. Gritonan di alegria y sacamento di selfie tabata acompaña tur e bishitanan.
Na final di e sesion Jeon a regala algun ticket y a invita e hobenan pa ta presente na e festival di mas grandi na Aruba den luna di November proximo. Ta trata di Island Takeover Festival cu presentacion di di J Balvin, Bad Bunny y Alex Sensation.
Passes pa e festival ta na benta na Citgo Boulevard, Citgo Palm Beach, Citgo Essoville , Superfood y AITO Pop Up Store na Renaissance Marketplace. Por escohe entre Seccion general (AITO General Pass, VIP Standing (AITO VIP Pass) y mesa VIP. Pa tur informacion toante mesa mester jama 569-6446.
Aruba Island Takeover (AITO) ta presenta pa Aruba Tourism Authority (ATA), Cerbez Presidente, MOET, SETAR N.V., Elite Empire Entertainment, EF, Aruba Marriot Resort, Top Drive, Hilton Aruba Caribbean, Hyatt Regency Aruba Resort, Fun Miles, Renaissance Aruba Resort, Holiday Inn Resort y Super Car Rental. Pa mas informacion, line-up di artista, compra di tickets y mas bishita www.islandtakeover.com of www.facebook.com/islandtakeover.