Confiansa ta algo serio y no tin espacio desconfiansa ni abuso di poder of confiansa.
Por medio di un rueda di prensa, Minister encarga cu Desaroyo Teritorial, Infrastructura y Medio Ambiente Otmar Oduber a duna di conoce e resultadonan di e investigacion cu a tuma luga riba ex miembro di team di maneho di Serlimar sra. Robin-Ann Didder cu luna pasa a wordo suspendi.
Minister Oduber ta enfatisa cu banda e funcion cu e ex miembro tabatin na e compania e tabata riba lista politico di un partido cu ta forma Gobierno tambe. E aspecto di integridad ta sumemente importante y mester por maneha bo mes conforme reglanan di bon gobernacion.
Manera ta conoci 7 di september 2018, a schors miembro di e team di maneho di Serlimar sra. Robin-Ann Didder y a prohibie pa presenta na trabou pendiente di resultado di investigacion. Recientemente e investigacion aki a termina pa cual e hunta di supervision a trata e resultado. Considerando cu ta trata un compania Sui Generis, Gobierno ta envolvi den e proceso.
E situacion constata ta cu contrario na acuerdonan cu tabatin cu e hunta di supervicion di Serlimar pa locual ta cierto placa/pago na miembronan, algun cos no a tuma luga conforme palabracionnan cu e hunta di supervision di Serlimar. E ex miembro di e team di maneho sra. Didder tabata bon na altura di toelage cu e no tabatin derecho riba dje, sinembargo toch a busca forma pa cobra esaki, ta trata un suma di 500 florin pa luna. Y ta den su funcion como parti di e team di maneho a instrui pa esaki wordo paga na su persona. Segun Minister Oduber ta splica no ta trata di un hecho castigabel, pero si un abuso di confiansa cu a tuma luga. Segun a wordo confirma den carta di abogado di sra. Didder, a yega na acuerdo cu sra. Didder lo ta pagando e suma aki bek na Serlimar.
Considerando locual cu a tuma luga, a notifica sra. Didder di e decision cu a wordo tuma pa pa desolve e team di maneho na Serlimar y pa cual e no mester presenta mas na trabou pa motibo cu e funcion cu e tabatin no lo mester wordo cubri mas pa su persona. Lo cumpli cu ne cu e ‘ter beschikking’ cu e tabatin te cu november 2018, pa cual e lo wordo paga y lo ‘verreken’ e pago cu e mester haci bek na Serlimar. Minister Oduber a termina poniendo enfasis riba e aspecto di confiansa y integridad cu ta algo hopi serio.