Prome Minister Evelyn Wever-Croes ta enfatisa cu e punto principal di e maneho di Gabinete Wever-Croes ta pa pone e ser humano central. Gobierno di Aruba ta buscando inversionistanan pa yuda cu e vision di Gabinete Wever-Croes aki. E Asamblea General cu a tuma luga na Nacionnan Uni recientemente, tawata e centro na unda mandatarionan di diferente parti di mundo a reuni pa decisionnan crucial cu ta wordo tuma pa locual ta trata siguridad, paz den region, cambio di clima, proteccion di medio ambiente y desaroyo social, entre otro temanan. Prome Minister tambe a participa na e reunionnan di nivel halto aki na unda relacionnan a wordo establici pa habri caminda pa Gobierno di Aruba logra e metanan pa Aruba.
E ‘Sustainable Development Goals’(SDG’s), e metanan cu Nacionnan Uni a establece 3 aña pasa pa caba cu pobresa den mundo y cu ta duna oportunidadnan igual na tur hende, ta hustamente e curason di maneho di Gabinete Wever-Croes: pone e ser humano central y crea oportunidad pa tur hende.
“Gabinete Wever-Croes tin un maneho social hopi prominente y ta un ehempel pa otro paisnan. Aruba ta reconoci mundialmente y pa Nacionnan Uni como un modelo ehemplar (‘best practice’) y asina nos ta spera di por atrae fondo pa yuda nos den implementacion di SDG’s. Berdad e retonan financiero ta importante, pero pa Gabinete Wever-Croes ta mas importante pa pone e ser humano central cu pa percura cu no tin deficit mas”, Prome Minister Evelyn Wever-Croes a duna di conoce.