ORANJESTAD, Aruba – Durante un ceremonia na oficina di Arubaanse Voetbal Bond na Shaba a tuma luga entrega oficial di e uniformnan nobo na refereenan. E proyecto aki tabata posibel danki na e sosten di Compra Ltd., cu recientemente a celebra 70 aña di existencia riba nos isla. Siendo agente di Gillette, a percura pa regala cada referee un total di 4 diferente set di uniform pa nan uza na nan mesun discrecion.
Presidente di Arubaanse Voetbal Bond, Ing. Richard Dijkhoff a expresa hopi gradicimento na Hubert Dirks y Ana Maria Ramirez di Compra Ltd., pa nan sosten di semper na e deporte rey, esta futbol. Tambe el a gradici Ernst Mohamed di e comite di sponsorship di e refereenan cu a coordina e proyecto aki.
“Futbol ta uni pueblonan, Futbol ta promove disciplina, movecion, competencia y entretenimento. Nos ta conta semper cu partnernan pa hunto nos logra metanan grandi pa desaroyo di futbol na Aruba”, asina Ing. Richard Dijkhoff a termina bisando.