Durante ultimo añanan tereno pa hotel, condominium y apartamento a wordo otroga na un forma desproporcional y sin maneho. Sin cu a tene cuenta cu desaroyo sostenibel y proteccion di nos medio ambiente. Den areanan Noord, esta Palm Beach y Eagle, definitivamente mester implementa un moratorio. Pa San Nicolas por permiti un desaroyo controla y sostenibel, cu e meta di fomenta y incentiva actividadnan economico pa e area. Hecho ta cu mester practica maximo esfuerso pa limita e impacto di e propiedadnan grandi aki cu a wordo otorga y cu Pais Aruba ta comprometi cu ne.
Minister encarga cu Desaroyo Teritorial, Infrastructura y Medio Ambiente Otmar Oduber ta pone enfasis riba cu e Gobierno aki ta para pa moratorio. ‘Nos a inicia cu e proceso di estudio di capacidad di carga cu pa fin di e aña aki mester desenvoca den un ley di moratorio. E estudio ta acapara e aspecto turistico, medio ambiental, social, infrastructural entre otro. E resultado lo wordo trata na nivel nacional, pa haya sa con lo bay atende cu e retonan di Pais Aruba.” Minister Oduber a splica cu e trabounan a cuminsa caba y entre otro ATA ta parti di dje.”
Recientemente, ATA tambe a haci estudio di capacidad di carga cu tabata dirigi riba e aspecto di turismo, importante pa menciona cu e estudio ta bisa cu desaroyo mester ta modera y segun e calidad cu kier pa e Pais pa por hisa e RevPAR pero tambe contribucion verdadero na economia local y calidad di bida di nos hendenan.
Pakico bin cu e estudio carrying capacity na nivel nacional?
Tin hopi otro sector cu mester tuma den consideracion y no djis turismo, como gobernante bo mester tin un plan pa acapara tur aspecto hunto. Si ta transforma desaroyo den turismo, mester por tin un otro plan, cual lamentablemente durante e ultimo decadanan e economia na Aruba no a conoce diversividad.’
Minister Oduber ta sali for di e punto di bista cu un crecemento sostenibel mester wordo logra a traves di un balansa entre e desaroyo infrastructural y e proteccion di su medio ambiente, cual maneho ta hancra den e maneho actual di Ministerio.