Bou di e gobernacion actual no tin ningun camber cu a wordo firma, esey ta caminda cu tin hopi confusionnan ta bin dilanti den comunidad. Locual cu a wordo firma recientemente entre mandatarionan ta un Memorandum of Understanding (MoU) cu St. Regis y no un erfpachtovereenkomst. Minister di infrastructura Otmar Oduber ta trece aclaracion riba e caso particular aki y ta menciona e impacto di e decisionnan tuma anteriormente y esfuersonan continuo cu ta wordo haci pa limita daño na Pais Aruba.
E situacion ta cu tin un erfpacht caba y e MoU ta pa evita/ minimalisa e dañonan di 400 camber na Aruba y pa evita cu Aruba ta haya un hotel di calidad inferior, cual ta contrario na e direccion di desaroyo turistico cu kier brinda. Ta trata di un tereno cu a wordo otorga caba den pasado (2006). E caso tabata uno particular como cu e tabata trata e unico tereno eigendom cu tabatin riba nos beachnan. Riba un tereno eigendom, bo por haci practicamente kico cu bo kier, sra. Marisol Lopez – Tromp como Minister e tempo ey a yega na un acuerdo, a haya e eigendom aki pa evita cu riba nos beachnan ta bay tuma luga construccion di ‘kico cu ta’ sin cu Gobierno por tin control riba dje. Den e negociacionnan a otorga e tereno bek den erfpacht cu e condicion cu nan mag di construi un hotel riba e tereno di mas o menos 120 camber timeshare (na 2006). Si refleha riba e ultimo añanan desde e negociacionan, por tuma nota cu e tereno aki ta cera, tin heki tur rond di dje y nunca el a wordo uza.
E tereno aki ta keda un disputa como cu e tin un caracter unico di tabata un tereno eigendom cu su gran balor debi na e localidad (dilanti beach). E ultimo 10 añanan tabatin e problema cu e tereno a bay di man pa man te cu el a yega na Riu. Ultimo dos añanan Marriott a cumpra Starwood y Starwood tabata doño di e propiedad di Caledonia cu ta e NV cu tin e tereno aki.
No por ‘ sin mas’ kita tereno/permiso
Si durante añanan nada a wordo haci y no tabatin negociacion andando, tin un ley cu ta trata ora cu kier ‘trek in’ un erpacht normal, mester dunanan un espacio pa cuminsa construi y no por yega kita esaki pasobra e erfpacht voorwaarden no a wordo cumpli cu nan. Esaki ta conta pa un caso normal, sinembargo den e caso aki tin un acuerdo caba cu Gobierno, pues si para nan e probabilidad ta halto cu nan ta haci un claim y pidi nan eigendom terein bek of pidi pa wordo paga na balor di e tereno y locual cu a perde si a construi (ganashi etc). Mester enfatisa tambe cu tur e 12 añanan nan a cumpli cu nan pagonan di erfpacht y Gobierno nunca no a nenga di acepta e pagonan aki. Importante pa remarca ta cu e area/ tereno no ta cay den Ruimtelijk Ontwikkelingsplan (ROP) ni groengebied, y e motibo cu ta kitando derecho di un hende pa motibo di un situacion nobo (capacidad di carga, entre otro) di un Pais ta haci cu pa para e tipo di proyecto aki no ta bay asina facil, Minister Oduber a remarca.
Terminando Minister Oduber a splica cu si apesar di e situacion treci dilanti, Gobierno tuma e decision pa bay corte y perde esaki, mester paga nan, riesgando cu e otro 7000 cambernan cu ya a wordo duna y comprometi door di Gobierno anterior tambe por entrega claim. Aruba su situacion financiero desastroso cu a hereda no ta den posicion pa cubri esaki.