ORANJESTAD – E siman aki, 27 di september, ta celebra Dia Mundial di Turismo; un oportunidad den cual Oficina di Turismo Aruba (A.T.A.) ta busca pa crea consenshi riba e sector, elogia su miembronan, pero tambe comparti conocemento cu ta hiba na e avance di e industria. Pa 2018, Nacionnan Uni a apunta e tema principal di e ocasion riba ‘Transformacion Digital.’ Relaciona cu esaki, A.T.A. a invita dos orador experto den e tereno pa amplia nos vision riba e topico aki. Sam Sheffer ta un di e oradornan aki.
Pa haya sa un poco mas di Sam Sheffer, ta menciona entre otro, cu el a traha pa companianan grandi di media enfoca riba tecnologia manera Engadget, The Verge y Mashable cubriendo un variedad di funcion. For di Social Media Manager y Creador di Contenido, te na Escritor, Productor y Editor, Sheffer tin un comprondemento hopi cla di kico tecnologia ta permiti nos logra den e era moderno. Como creador y productor di contenido digital, Sheffer ta bon conoci pa su canal di YouTube caminda el a cosecha un audiencia di miyones di siguidor pa su blog personal, como tambe critica y conseho tecnologico.
E ta prome pa conta cu e ta apasiona y, te hasta, obsesiona cu tecnologia. Henter su bida el a biba y soña cu video games, celular, camara, computer, internet y otro aparatonan. Su inicio profesional tabata den tech media cu 19 aña na Engadget, caminda el a bay for di traha como stagiaire pa bira editor dentro di dos aña. Consecuentemente, el a pasa cuater aña lantando e social media di The Verge, y hibando varios cuenta na surpasa mas di 1 miyon siguidor. Sam a uni na Mashable na 2015 pa dirigi su esfuersonan di Snapchat Discover y crea contenido di video pa YouTube, Facebook Live y Instagram.
Actualmente Sheffer ta crea contenido independiente pa su propio audiencia for di New York City caminda e ta biba. Pa e conferencia di A.T.A, Sheffer ta comparti escenario cu Daniel Newman, kende ta un experto y escritor renombra, y cu mescos cu Sheffer, ta identifica y compronde e pulso den cual tecnologia ta transformando nos mundo. A.T.A. ta orguyoso di por tin ambos na Aruba pa comparti nan conocemento y ta spera cu tur participante lo sa di probecha di e oportunidad valioso aki.