ORANJESTAD – Cu presencia di Minister Presidente mr. Evelyn Wever-Croes, Minister di Turismo Dangui Oduber y Minister di Cultura mr. Xiomara Ruiz-Maduro, ayeratardi na bahada di solo a tuma lugar e lansamento di e cancion y video “Aruba” produci pa Jeon y Ritmo Real na Parke Nacional Arikok. Nos talento internacional Jeon despues di su éxito MACHIKA ta presenta otro bunita producción dedica na nos dushi isla Aruba cual ta un forma cu Jeon ta mustra su orguyo y ta gradici Aruba haci su soño bira realidad. Invitadonan e.o. familiar-, amistad- y prensa, tabata tin e honor di biba e momento grandi y emocional na momento cu e video a wordo estrena riba e pantaya grandi acompaña pa e canción Aruba. Como arubiano bo ta sintibo hopi orgulloso ora boscucha e letranan “Aruba dushi tera…..unda mi a lanta y crece…”, un bunita cancion pa habri un siman positivo asina minister Ruiz-Maduro a trece dilanti na e invitadonan presente. Un palabra di felicitación y gradicimento grandi ta bay na tur esnan cu a haci e produccion di e cancion y video un realidad. Ban comparti e canción y e video pa mundo henter será mas conoci cu nos talento local Jeon y nos dushi isla Aruba.