Diaranson mainta Minister di Deporte Sr. Dangui Oduber a reuni cu FIFA Development Director di e region di Caribe y Africa Sr. Veron Mosengo-Omba hunto cu su delegacion. Sr. Richard Dijkhoff cu ta representa Aruba den e comision di FIFA a haci e reunion aki posibel.
E Organisacion di FIFA no ta enfoca solamente riba loke ta trata e weganan di futbol pero tambe riba e parti social y e parti di desaroya mas hungador di futbol. Pa haci esaki posibel FIFA ta inverti den e federacion local hunto cu ayudo di e gobierno. Minister Dangui Oduber a trece dilanti e precupacion cu Aruba tin cu su compleho deportivonan cu no ta apto pa hunga weganan internacional di futbol. Tambe e dos partidonan a combersa con FIFA lo por yuda na renoba nos compleho deportivonan. FIFA tabata hopi positivo y a mustra interes pa yuda Aruba.
Ora bo tin un compleho deportivo cu tin tur e rekisitonan basico na ordo y den un bon condicion, esaki mes lo stimula nos hobennan pa practica e deporte di futbol segun e mandatario. E dos partidonan lo bay pone tur cos riba papel y discuti e detayenan pa asina yega na un acuerdo concreto. E acuerdo aki lo mester wordo firma den forma di un MOU cu lo por tuma lugar na Zurich of na Aruba mes. E acuerdo aki lo bira algo historico pa Aruba, Minister Oduber lo ta e prome Minister di Deporte cu lo sera un acuerdo cu FIFA na bienestar di deporte na Aruba. E mandatario a keda sumamente contento di con e reunion a bay y a bisa cu pronto lo ta firmando un MOU.