Den conferencia di prensa di Gobierno dialuna mainta, Premier Evelyn Wever-Croes a amplia riba e vision di Gabinete Wever-Croes pa centronan di ciudadnan. Pa ehecucion di e vision aki, Gobierno a institui e comision AREA pa asina a traves di innovacion trece bida bek den nos centronan di ciudad na Aruba.
E structura di AREA ta conta cu un ‘stuur group’ cu señor Jossy Lacle na cabes kende ta trahando boluntariamente. ‘Task force’ di San Nicolas y di Playa tambe a keda institui cu ya a cuminsa traha a base boluntario pa trece bida bek den nos centronan di ciudad.
Ambos ‘task force’ ta consisti di hendenan y organisacionnan activo den e districto. Y tin como meta trece bida bek den centro di cuidad. Hunto e ‘Task Force’-nan ta haciendo un analysis di e situacion actual, hunto cu ‘stakeholders’, y ya a conseha Gobierno riba cierto ‘quick-wins’ y dentro di poco lo presenta esakinan na comunicad. E ‘quick-wins’ ta cosnan chikito cu por haci impacto grandi. Tambe a cuminsa caba locual ta e plannan pa termino largo cu ta rekeri mas analysis y tempo pa ehecuta. E trayectonan aki lo cana paralel.
QUICK WINS SAN NICOLAS: San Nicolas lo biba bek y pronto su energia y cultura vibrante lo por wordo experiencia pa nos tur y pa nos bishitantenan.
OFICINA DI TURISMO:
Mininster di Turismo y ATA a yega na un acuerdo pa remodela e oficina di Turismo na San Nicolas uzando innovacion y tambe lo ‘beman’ e oficina aki pa asina percura cu nos bishitantenan por ricibi un bon servicio y tur informacion cu nan tin mester pa haci nan bishita na San Nicolas mas agradabel, pa nan por explora mas, sa unda por come of bebe algo. Esaki ta premira cu lo keda cla fin di september
CHANGA
E obra di arte Changa (cu ta un wega di domino) tambe pronto lo wordo instala y incorpora den e agenda pa turismo. E meta ta pa haci di San Nicolas un centro cultural. Tin cierto construccion chikito cu tin cu haci pa acomoda e instalacion. DOW hunto cu Minister di Infrastructura ta encarga cu e parti infrastructural.
WIFI
Ta mirando tambe e posibilidad pa Free WIFI den e centro di San Nicolas, hunto cu Setar, Minister di Turismo y ATA.
ACTIVIDAD
Ta preparando un calender di actividad cultural pa e comunidad, y pa nos bishitantenan por disfruta di San Nicolas. Entre otro Minister di Turismo ta desaroyando un concepto pa cu festival pa tanto local y tursita. Tin varios museo cu calendario di actividad y tambe lo tin actividadnan educativo y innovativo durante e proximo lunanan. Hunto cu Santa Rosa lo desaroya tambe un Farmers Market y lo presenta e conceptonan aki na ‘stakeholders’ fin di september. E Fast Ferry tambe lo trece cambio pa San Nicolas. Muraya di Lago lo wordo kita pa asina tin bista pa lama.
QUICK WINS CAYA BETICO CROES:
Caya Betico Croes lo bira un centro vibrante un biaha mas. Nos kier mira teras, cafetjes, pop ups den caya. Tambe ta enfoka pa desaroya e espacionan mas ariba den vivienda pa jovennan y young professionals aunke cu esaki lo tuma poco mas tempo. Awor ta bay enfoca riba algun quick wins di awor pa fin di aña. Nos ta bay haci lo maximo pa atrae hende bek den nos centro di cuidad. Gobierno mester a tuma decisionnan tocante parkeo, tram, como tambe tocante habri caya entre otro.
TRAM:
E tram lo pasa full den caya, y para na punta di caya pa un periodo mas largo, esta 40 minuut p’asina turistanan baha y cana den caya.
Un otro sugerencia ta pa e tram tin loop mas chikito y para na La Linda di mucha of Zara, y no drenta caya. Asina turistanan ta wordo forsa pa baha eynan y cana den caya. E posibilidad aki tambe lo wordo explora den futuro. E futuro definitivo di e tram lo wordo dicidi pronto; nos a pone esaki den man di Minister di Transporte, Minister di Turismo y Minister di Infrastructura.
HABRI CAYA PA TRAFICO
En bista cu no ta sigur si e structura nobo den caya ta prepara pa trafico constante, pero toch pa complace e tantisimo peticionnan, temporalmente nos ta habri e caya algun ora mainta y algun ora atardi. Esaki ta pa haci posibel cu hendenan por pasa keiro den caya y mira loke tiendanan tin. Una bes nos keda cla cu terasjes etc, lo mira si or tene caya habri pa trafico pasobra tur dos no ta posibel.
PARKING
Minister di Transporte a anuncia cu lo elimina awor 500 espacio di parkeo cu ta 1/3 parti cu ta bira parkeo gratis. Zonanan cu lo bira gratis lo wordo indica. Unda cu mester paga parkeo lo wordo enforsa si, y lo duna boet en bes di klem of touwmento. Pa futuro cercano lo busca un forma mas eficiciente pa paga via un app.
FIN DI AÑA:
AREA ta trahando riba un proyecto pa trece bida den caya pa fin di aña. E lusnan di Pasco a wordo besteld caba y lo wordo instala pa fin di october. E sistema di zonido ta cla pa wordo instala. Fonteinnan tambe ta traha. Nos meta ta pa fin di october organisa un actividad pa cende e lusnan di Pasco y asina duna comienso na campaña di fin di aña.
Tambe pronto lo anuncia un calender di evento di october te cu fin di aña cu ta bou encargo di señora Lindy Croes.
“Apesar di tur e retonan di nos pais, Gabinete Wever-Croes ta trece solucion pa evita esakinan bira problema. Nos ta traha na bienestar y progreso pa Aruba. Y cu e vision pa trece bida bek den nos centronan di ciudad, nos tur por sinti orguyoso di ta Arubiano”, Premier Wever-Croes a expresa.