ORANJESTAD, Aruba – 18 di September 2018: E torneo di Copa ABC a cuminsa diasabra despues di 30 aña unda cu e campeonnan y sub campeonnan di Aruba, Boneiro y Corsou a enfrenta otro. E campeon di Aruba, esta SV Dakota, a enfrenta e sub campeon di Corsou, S.V. Vesta. E wega a termina 3-1 pa S.V. Vesta, kende a pasa p’e siguiente buelta cu lo ta dia 22 di September proximo.
E anochi a cuminsa cu un apertura unda tabatin baile cultural riba ritmo di steelpan di Nico Connor. Minister di Deporte, Dangui Oduber, a hiba palabra gradiciendo tur hende presente y desea tur team exito. Tambe a conta cu presencia di Franklin Matilda y Erick Frail di federacion di Corsou, kendenan tabata contento cu despues di 30 aña a organisa un biaha mas Copa ABC, cual antes tabata Copa Antiano. Presidente di Arubaanse Voetbal Bond (AVB), Ing. Richard Dijkhoff a gradici Stanley Koffie cu a pusha pa tin Copa ABC un biaha mas. Minister Oduber a haci a prome sak’e di bala pa duna inicio na Copa ABC.
E wega a inicia cu ambos team bayendo den atake pa yega area di gol buscando pa anota gol. Na diferente ocasion S.V. Vesta a tira riba gol di Dakota y faltando 1 minuut prome cu e mita tempo termina, Corsou a bay ariba 1-0. Den e di dos tempo ambos team a sigui hunga fuerte, S.V. Vesta tabata pasa e defensa di Dakota y asina a anota 2 gol mas, mientras cu Dakota a logra anota un gol.
Henry Caldera, coach di S.V. Vesta, tabata contento cu a bin bek cu Copa ABC, y e teamnan semper ta anhela cu despues di a bira campeon y sub campeon pa sigui hunga. Pa S.V. Vesta aunke e wega a termina 3-1, Dakota a haya chensnan cu por a hinca e team di Corsou den mas problema. E coach a expresa cu nan sa cu Dakota ta un team fuerte y a mira videonan di e wega final. Tambe Dakota tin dos hungado cu a hunga un bon wega. Tambe Dakota a hunga fuerte y tabata defende fuerte, asina Henry Caldera a expresa. E wega no tabata facil pa S.V. Vesta, asina el a expresa pero ta contento di e victoria.
Coach di Dakota, David Abdul, a expresa cu S.V. Vesta tabata un team dificil cu a hunga hopi fisica y cu hungadonan cu hopi forsa. Den e prome tempo Dakota a sali miho y a domina e prome tempo. Faltando 1 minuut di tempo S.V. Vesta a bay ariba y den e di dos tempo e wega di Dakota no a bay manera mester ta. Despues di hopi luna nan a bin hunga wega oficial, di cual David Abdul ta kere cu por tene e torneo aki memey di campeonato. Dakota ta contento cu nan a clasifica como e miho perdedo pa asina hunga den e siguiente buelta. Tabatin hopi plus punten pero ainda tin cosnan pa sigui mehora, asina David Abdul a expresa.
Na final di wega S.V. Vesta a bay cu e victoria y ta pasa p’e siguiente buelta. Na Boneiro e sub campeon di Aruba, Deportivo Nacional, a perde 4-1 contra Real Rincon y a keda elimina. Jong Holland di Corsou a gana e sub campeon di Boneiro cu e score di 5-0 y asina a pasa e siguiente rond. Asina SV Dakota a pasa p’e siguiente rond como e miho perdedo. Copa ABC lo continua diasabra dia 22 di september, unda Dakota lo biaha pa hunga na Corsou contra Jong Holland y S.V. Vesta lo enfrenta Real Rincon.