Diahuebs atardi Minister di Deporte Sr. Dangui Oduber a ricibi e hoben Ethan Tromp na Cocolishi. E Minister ta contento di mira e oportunidad cu un futbolista hoben a ricibi pa bay studia y hunga futbol cu FC Twente na Hulanda. Ethan ta un hoben di 16 aña cu a cuminsa practica e deporte di futbol cu un edad di 7 aña den e organisacion di SV Bubali. Ethan a bay Hulanda pa un stage y FC Twente tabatin luga pa 1 hungado di Aruba y a scoge Ethan.
Ethan a forma parti di e seleccion U-15 aña pasa, unda cu el a participa den weganan di CONCACAF representando Aruba. E aña aki danki na AVB y Martin Koopman, scouting di Hulanda a scoge Ethan pa bay FC Twente. Famia di Ethan ta contento di e oportunidad duna na e futbolista. Den e ekipo di SV Bubali Ethan ta hunga den e posicion di bolante.
Ethan Tromp ta contento di e oportunidad cu el a ricibi cu FC Twente a busce, pero tambe cu Martin Koopman y AVB a yude. E ta gradici tur hende cu a yude cu awe el a ricibi un oportunidad asina aki cu e por yega leu. Ethan su soño ta pa un dia hunga pa e ekipo di FC Barcelona.
Minister Dangui Oduber ta curasha tur deportista na Aruba pa sigui haci nan maximo esfuerso, pasobra bo no sa ki dia un oportunidad ta bati na bo porta. Minister ta desea Ethan tur clase di exito den su ekipo nobo di FC Twente pero tambe den su estudio cu tambe ta hopi importante.