Minister Dangui Oduber ta anuncia un aumento remarcabel den e RevPar (Revenue Per Available Room) pa Aruba. Te cu juli 2018 nos por mira un aumento di 12.7% compara cu e mesun temporada na 2017. Di USD 219.71 RevPar a subi te na USD 247.51. E RevPar di Aruba ta e di 3 mas halto den Caribe despues di Turks & Caicos y St. Lucia. Esaki ta indica cu turistanan cu un capacidad halto pa gasta ta yegando Aruba. Na February 2018 Aruba a conoce un RevPar di USD 316.77 pues cifranan record pa Aruba. Pa locual ta trata ocupacion di hotel por wak cu esaki ta na 88% te cu juli 2018 pues casi 9 di 10 camber ta wordo ocupa. Por mira tambe un aumento di 7.8% den bishitantenan cu pa prome biaha ta bishita nos destinacion. E grupo aki di “first timers” ta sumamente importante mirando cu nan lo ta e repeat visitors di futuro. Pa locual ta trata “repeat visitors” por tuma nota cu bishita di e asina yama “baby boomers” a conose un aumento di 5.6% desde january te cu juli 2018 compara cu e mesun temporada na 2017 pues te cu juli 2018 102,416 persona di edad entre 54 y 74 aña a bishita Aruba. Esnan cu a bishita e Aruba entre 2 pa 5 bes te cu juli 2018 a aumenta cu 4.2% en comparacion cu e mesun temporada na aña 2017.
