ORANJESTAD – Manera conoci, diahuebs siman pasa Parlamento di Aruba a aproba e presupuesto 2018 pa locual ta e Tourism Product Enhancement Fund (TPEF). Varios pregunta importante a wordo haci den e reunion aki siman pasa pa forma e vision riba kico ta importante pa producto Aruba y tambe pa locual ta e siguridad di nos turistanan.
E fondo di TPEF (Tourist Product Enhancement Fund) ta uno designa pa embeyecemento di nos isla pa percura cu e areanan turistico ta keda atractivo, pa asina garantisa un experiencia inolvidabel pa nos bishitantenan. Minister encarga cu Turismo a contesta varios pregunta di Parlamento por escrito splicando entre otro e constelacion y funcion di e fondo aki, y tambe a inclui un resumen di e proyectonan ehecuta pa e fondo aki desde 2010-2017.
“Mirando cu ta tratando presupuesto di TPEF pa 2018, y apenas falta cuater luna pa termina e aña presupuestario aki, mi a haci e pregunta si minister por duna un indicacion con e ta wak cu e fondonan a wordo aloca. Y si esaki ta den cuadro di e sumanan presupuesta of ta premira cu lo por tin necesidad di fondonan adicional, of cu lo por sobra pa 2018”, Parlamentario Daphne Lejuez ta splica. Alabes, Parlamentario Lejuez a pidi e mandatario pa suministra Parlamento cu e cuentanan anual desde 2010 pa asina den cuadro di transparencia y bon gobernacion por haya un miho bista como Parlamento cu e fondonan berdaderamente a wordo aloca manera presupuesta. Esaki ta e puntonan cu Parlamentario Lejuez a trece dilanti durante e prome tanda.
Siguridad pa nos bishitantenan
Na e segundo tanda Parlamentario Lejuez a gradici minister pa su contestanan y pa su splicacion anto a wordo puntra tambe pa ki tempo Parlamento lo por ricibi e presupuesto TPEF pa 2019 como tambe e cuentanan anual di e añanan anterior.
“Adicionalmente mi a comparti un preocupacion y observacion cu minister encarga cu infrastructura, mirando e accidente lamentabel cu a sosode cu un turista den trafico e siman cu a pasa. Si tin atencion pa e parti di mehora control y seguridad pa nos turistanan”, Parlamentario Lejuez ta expresa. E ta sigui bisa cu: “Aki mi kier a enfoca, por ehempel, un area cu a yama mi atencion, cu ta e area riba Sasakiweg dilanti di Superfood. Un area cu ta frecuenta pa turistanan en particular cu ta crusa e caya aki pa sea bay supermercado of crusa di otro banda pa yega na beach.”
Antes esaki tawata wordo haci na e luz di trafico, pero awor cu e introduccion di e rotonde, cu a mehora e fluho di trafico, a introduci tambe zebrapad net na entrada y salida di e rotonde pa por crusa Sasakiweg.
Esaki ta un di e areanan cu e Parlamentario a comparti hopi preocupacion p’e mirando cu a pone e zebrapad prome cu a bin cu iluminacion, pues parti anochi e por causa un problema pasobra bo no ta wak e personanan aki y automobilistanan ta core velocidadnan basta halto riba e caminda aki. Mirando specialmente e velocidad, hopi biaha halto, cu cual ta core riba e caminda aki y tambe e tiki visibilidad actual, e Parlamentario a puntra pues kico den minister su opinion por wordo haci pa garantisa e seguridad di bishitantenan cu ta haci uzo di e zebrapad aki ambos den dia y sigur den parti di anochi? Minister encarga cu Turismo a contesta cu esaki tin su atencion, el a traha un nota y lo sigura pa esaki wordo investiga pa wak ki opcionnan tin pa esaki. E dia siguiente durante reunion di DOW, tambe Parlamentario Lejuez a trece esaki dilanti durante stemmotivering pa cu minister Otmar Oduber kende tambe a traha un nota di dje pa sigura cu tin atencion riba esaki. Pa asina por mira con por soluciona esaki y sigura cu e no lo forma un peliger of causa algun tipo di desgracia pa motibo di falta di siguridad.
Parlamentario Lejuez: “Na final di dia e intencion ta pa mehora, pero tambe por garantisa siguridad di nos bishitantenan.”