ORANJESTAD – Dialuna atardi Minister di Finansa, Asuntonan Economico y Cultura señora mr. Xiomara Ruiz-Maduro tabata tin e honor di duna acto di apertura di “Exposicioon Censo 1960-2020” na Biblioteca Nacional na Oranjestad. E exposicion organisa pa Oficina Central di Estadistica, ta duna e pueblo di Aruba e oportunidad pa admira e historia di tur Censo cu a yega di wordo haci na Aruba. E prome Censo na aña 1960 a wordo organisa y financia pa compania Lago Oil & Transport, sigui pa Censo 1972 y 1981 cu a wordo organisa centralmente door di e oficina Central di Estadistica na Willemstad, Curaçao pa tur e islanan cu tabata pertenece na Antiyas Hulandes, incluyendo Aruba. Na aña 1991 Oficina Central di Estadistica di Aruba a organisa e prome Censo desde cu Aruba a logra su status aparte, sigui pa Censo 2000 y Censo 2010. Minister Ruiz-Maduro ta felicita esnan cu a prepara e exposición y alavez invita e pueblo pa bishita e exposición cual ta ilustra en corto tur e inovacionnan cu cada Censo a conoce durante e añanan y alabes ta duna un corto introduccion di Censo 2020 cu ta den full preparacion caba. E pueblo di Aruba lo por lesa diferente informacion y alabes wak diferente video cu ta contene informacion valioso colecta durante e Censonan.