Manera nos tur por corda, den luna di Maart Minister Glenbert Croes a haci su prome biahe oficial pa Hulanda durante cual e mandatario a reuni entre otro cu Unicef tambe. Unicef ta e instancia oficial di derechonan di mucha di Nacionnan Uni. Nan meta ta pa percura pa tur pais na mundo respeta y cumpli cu derecho di mucha. Mirando cu pa e mandatario esaki tin tur prioridad, durante su bishita na Unicef el a solicita pa asistencia tecnico y profesional riba e tereno aki.
Na Corsou den luna di April a tuma lugar e Conferencia di Reino riba derecho di mucha durante cual Unicef tambe tabata presente. Tabata na e conferencia aki cu Unicef a acepta e invitacion oficial pa bishita Aruba y haci un orientacion social como tambe un evaluacion di e Crisis Plan Social di nos Pais.
Durante e rueda di prensa, Unicef a confirma cu e Crisis Plan Social di Pais Aruba ta cuadra den liñanan grandi cu Unicef su propio recomendacionnan. Locual cu na parecer di Unicef ainda mester di mas atencion, ta e falta di mas personal specialisa pa elimina tur e listanan di espera di casonan ya ‘redflags’ cu tin na diferente instancia. Riba esaki Unicef ta desea pa Gobierno pone mas atencion.
“Un cos fundamental pa nos ta lo siguiente: e unico manera cu nos ta logra gana e bataya aki pa loke ta trata abuso di mucha, abuso contra hende muhe, hende homber, nos bieunan abuso contra handicap, abuso en general ta si nos kibra silencio. Violencia entre pareha cu tin consecuencia pa e yiunan, violencia contra e yiunan, violencia contra nos grandinan, den e Aruba cu nos ta visualisa nos kier un Aruba den cual nos ta cuida y proteha otro”, Glenbert Croes a expresa.
“Hopi hende no ta kere den locual nos a cuminsa cu ne. Hopi hende ta kere cu e lo ta un historia sin final. Ohala cu nos por crea e fundeshi pa e hogar Aruba cu nos tur como ciudadano por ta orguyoso di dje den cual nos muchanan y nan bienestar ta wordo respeta, un Aruba unda nos grandinan ta haya e cuido di gratitud cu nan merece, e Aruba unda cu nos ta biba cu respet pa otro, cu respet pa bida.”