Den un comunicado di e Departamento di Naturalesa y Medio Ambiente (DNM) recien publica den medionan di comunicacion, un biaha mas, ta evidente e prehucio of odio contra piscadonan di parti di DNM. Bou di e titulo: “Sushedad laga atras na baranca pa usuarionan y piscamento excesivo”, e departamento di gobierno aki cu mester representa tur hende na Aruba, ta pretende cu ariba keho ricibi ta pretende cu tur sushedad na costa, baranca y beach ta di piscadonan y “piscamento excesivo”, mustrando asina claramente un discriminacion contra piscamento y piscadonan di Aruba.

Nos a tuma contacto cu varios organisacion cu ta haci limpiesa, tanto den persona como riba internet, y tur ta mustra cu gran mayoria di sushi cu ta ser haña na costa y playanan, ta articulornan di uso deshechable cu mayoria probablemente ta procede di e industria turistico. Berdad podise leu a leu ta haña articulonan di pesca na baranca, pero nan ta calcula brutamente: si di cada 30 saco cu yena, podise mitar (1/2) saco so lo ta di articulo di pesca. Esaki ta logico tambe riba e simple proporcion di nos industria di turismo miyonario cu ta trece miyones di hende tur aña compara cu piscadonan local.  Ta logico tambe, djis pensele pa bo mes sin prehuicio un rato, cu si tin miles y miles di hende ta bin tur dia na un luga y 1 of 2 podise ta piscado, ken lo ta lagando mas sushi atras?

Nos no ta bisa, cu no por tin cosnan di piscamento ta keda atras tin ora, ni tampoco ta asina cu piscadonan ta contra turismo, pero pa laga DNM pretende y bisa cu ta tur sushi na costa ta di piscadonan, ta un abuso. Es mas, si bo tuma tempo cana den lugarnan cu ta bende cos di pisca, bo lo compronde tambe, cu un piscado, piscado mes mes, no lo tira su material afo sin mas, paso material di piscamento ta bon caro pues hopi balioso. Cana den un lugar cu ta bende articulo di piscamento, ta mescos ta den un hoyeria bo ta cana pa su prijsnan halto. Un pober piscado pues, lo trata todo por todo pa mantene su material cune. Claro, cu por tin aficionado cu hopi placa cu di bes en cuando ta hecha baina, esey tin den tur gremio. Remarcabel ta e hecho si, cu DNM ta opta pa enfoca unicamente riba e piscado. E homber chikito. No ta adresa e industria grandi cu tur dia ta usa materialnan desechable, cu nan botonan ta mara y kibra coral con cu ta y unda cu ta, no ta adresa e hotelnan biyonario cu ta laga cups, forki, straw etc. tur bula bay lama tur dia. No, ta e pober piscado ta e malo, ATROBE!

Si ta coral ke proteha, piscadonan lo ta e promenan yama pa yuda bo, paso piscadonan sa e balor di e recurso. Un piscado responsable sa, cu e si, mester por bolbe mañan of otro mañan na mesun sitio y pesey ta cambia di marca unda e ta pisca y ta cuida su marca y e recurso. Djis puntra cualkier piscado. Contrario na esaki, nos ta mira tur dia un industria turistico cu ta sin piedad destruyendo tur recurso. Si ta coralnan ke proteha, adresa e fluho incontrolable di hende cu ta bula den awa riba coral, cu suntan dañino, e dredge cu ta cobando tur caminda, e autonan buggy cu ta core lanta stof tur caminda, e trahamento di hotel y apartment ilegal tur caminda, hasta riba awa… E miles y miyones di turista cu ta cabando cu e recurso aki, no sa e balor di e recurso y aparentemente no tin niun hende cu ta tribi di adresa esaki directamente paso nan ta e gran sponsornan y pesey ta keda explota e recursonan marino sin piedad.

No, eseynan nos no ta mira articulo di DNM! Ban dal e pober piscadonan cu palo, esey si DNM por!  Anto mas ironico ainda, ta pa tende cu e supuesto parke marino cu ta introduci pa prohibi piscado, no ta bay conta pa e botonan y baranca na malmok, y playanan na palm beach y eagle of na hotel riba awa na Savaneta, paso ki mishi atende cu e grandinan aki. DNM no ta bay pone vaste anker cu boei pa e botonan charter cu ta kibra cos No, …ta e piscadonan cu ta tira dos liña, DNM kier lastra den prensa, DNM kier pasa ley sin tene cuenta cu piscado y hasta ta balota piscado. Cu e articulo aki piscadonan den union kier condena e atakenan vil, descriminatorio y polarisante di DNM y ta haci un yamada publico na Minister pa publicamente laga e departamento concerni coregi y disculpa pa esaki, paso simplemente no ta husto.

Piscdonan den union