Durante reunion publico di Parlamento pa trata e presupuesto di DOW, Alan Howell, Parlamentario di POR a indica cu tin un problema pa basta tempo caba, ora awa yobe duro, awa ta core di Wegkustbatterij ta bin abou caba te banda di e misa Metodista, cu ta keda patras di Abraham de Veer School.
Pa añanan largo e hendenan den vecindario ta sufri ya cu awa ta yena nan cas. A scucha diferente storia riba esaki y awor Alan Howell como Parlamentario a haci un peticion na Minister di Infrastructura pa tira un bista riba esaki y trece un alivio pa e habitantenan aki.
Ploegen di Serlimar tambe a haya atencion di Howell, e por a compronde cu den futuro e ploegnan aki lo bay cay bou di DOW y ta puntra cual ta e motibo pa esaki, pa ki tempo tin pensa di haci esaki y si e cambio aki berdaderamente ta factibel.
Tambe el a puntra cuanto ploeg tin na e momentonan aki pa pariba di brug, si nan ta suficiente of ta mira cu mester di mas. Igualmente el a puntra si tin suficiente opzichters pa e ploegnan cu tin na e momentonan aki.