Home Politics TJON Y THIJSEN: EXPRESHONNAN SR. BLOK INCOMPRENDIBEL Y INACEPTABEL

TJON Y THIJSEN: EXPRESHONNAN SR. BLOK INCOMPRENDIBEL Y INACEPTABEL

Presidente di Parlamento sr. Mr. J. Thijsen y lider di fraccion di MEP sr. R. Tjon MBA, a tuma nota di expreshonnan haci door di e mandatario Hulandes encarga cu asuntonan di exterior, sr. Stef Blok.

EXPRESHONNAN SR.BLOK
Durante un reunion e mandatario a expresa cu e no conoce un comunidad multi-etnico of multi-cultural, caminda e habitantenan original ainda ta biba y cu tin lazonan di cooperashon sano y cu ta biba pacificamente cu otro.

STATUUT DI REINO
Den concepto di sr. Thijsen y sr. Tjon e expreshonnan aki ta anti comunidadnan multicultural y discriminatorio. E expreshonnan haci door di e mandatario Hulandes te hasta ta bay contra di nos Statuut. Den nos Statuut ta ancra cu ta e deber pa semper salvaguardia e derechonan fundamental di e ciudadanonan di Reino. Mas ainda e hecho cu Reino Hulandes y Surinam cu tawata forma parti di Reino Hulandes ta paisnan multicultural, ta pone cu e expreshon di e mandatario aki ta condenabel.

INTERESNAN DI REINO
E mandatario en cuestion, den cuadro di su funcion entre otro, tin e deber di sali na interes di Reino y salvaguardia interesnan di Reino. Consecuentemente e pregunta cu ta surgi ta si e mandatario en cuestion, ora efectua su tareanan na bienestar di Reino, por haci’e na un manera objectivo y confiabel.

COMISHON DI ASUNTONAN DI REINO
Den cuadro di nan funcion como lider di e delegacion Arubano (Thijsen) y vocero (Tjon) di e comishon aki ambos Parlamentario a duna di conoce di lo sigui e debatenan cu lo bay wordo hiba den Tweede Kamer riba e topico fragil aki di cerca.