Home Police Kere of no, atrobe ilegalnan a drenta nos isla, na Santana di...

Kere of no, atrobe ilegalnan a drenta nos isla, na Santana di Cacho

Seroe Colorado: Diabierna pa mas o menos 9’or y mey di anochi, un habitante di Seroe Colorado ta mira dos homber desconoci muha, canando for di direccion di Santana di cacho bayendo pabou, di biaha e persona aki a avisa polis.
Mesora a manda un patruya controla den full e area di Seroe Colorado, pero nan no a topa cu e dos personanan aki.

Den oranan di marduga Kust Surveillance tambe a bay tene un control den e area aki y a topa cu un auto sospechoso cu algun persona den dje y a bin resulta cu no tabata tin ilegal, pero ta hendenan local cu un rato prome a horta un Toyota Tercel aki for di un cas na Savaneta, polis a detene e personanan y a confisca e auto.

Den e mesun oranan di marduga aki, un patruya di polis atento a bay tira un control den area di Santana di Cacho y ta bin topa cu un boei improvisa. E boei tabata traha di un blokie foam, mara cu un cabuya hopi largo berde, bou di e boei tabata tin un baranca mara cu klemnan di metal nobo. riba e boei tabata tin un palo basta largo hinka den e foam y na e top e tabata tin un banderin cora. Aparentemente esaki por ta un senjal pa ileganan drenta sin problema of por ta esaki lo por ta unda nan lo a mara un cargamento di droga, arma of algo otro.

Un poco mas pabou unda ta dera cacho a bin topa cu un pida foam grandi cu por a wordo usa como un board pa landa bin tera. Polis a sigui buska y a  topa cu varios artefactonan cu ta wordo usa na momento cu ilegalnan ta drenta nos isla, tambe a topa cu pañanan muha. Esakinan tur ta indica cu ilegalnan a bolbe drenta nos isla na Santana di cacho, anto den oranan trempan di diabierna anochi. No ta conoci cuanto a drenta y mucho menos kiko tur nan por a drenta cu ne. Un cos ta sigur cu nan sa con pa burla di e sistema y di control di Kustwacht, kust surveillance, polis etc. paso semper nan ta drenta ora y unda no tin control.

Cuanto mas lo sigui drenta, prome cu enberdad e controlnan na nos costanan bira mas severo, cu polis haya un helicopter, radar etc pa haci control for di ariba lama caba y no duna niun boto chens di yega cerca di nos costanan, ban spera cu pronto esaki wordo realisa, paso e pueblo ta hopi precupa cu asina hopi tempo ta pasando y mester haci hopi mas ainda, pa stop e yegada di botonan ilegalnan aki.