Home Politics Parlamentario Michael Lampe Pakete di medida introduci sin preparacion perhudicando pueblo formalmente

Parlamentario Michael Lampe Pakete di medida introduci sin preparacion perhudicando pueblo formalmente

Un ambiente di incomodidad, domina pa insiguridad y cu hopi incertidumbre pa futuro, ta loke ta reinando den comunidad na e momentonan aki, ya cu no solamente pueblo ta wordo confronta c’un pakete di medida inespera y contrario na loke nan a priminti durante di campaña electoral, pero pueblo no sa kico ta bay sigui den proximo lunanan nos dilanti.

Parlamentario pa fraccion di AVP, sr Michael Lampe ta mustra cu e kehonan cu ta drentando di tur skina di comunidad, ta refleho real di un maneho di gobierno, cu for di inicio no a mustra di ta dirigi pa yuda interes general di pueblo.

Al contrario, segun Parlamentario Lampe e  ultimo desaroyonan cu a surgi desde prome di juli na momento cu gabinete Wever Croes a introduci e pakete di medida, ta muestra cla cu pueblo tin un gobierno cu ta nabegando sin compas, guiando henter e pais den un rumbo sin destino y sin solucion.

“Un gobierno cu ainda no por presenta un programa di gobernacion real y concreto, ta crea caos y ta percura pa incertidumbre ya cu pa dos siman caba, pueblo ta realisando cu e placa cu e tabatin pa su gastonan di tur luna, a bira menos sin perspectiva algun pa haya un alivio den lunanan nos dilanti.

E kehonan ta den tur nivel di comunidad,  caminda sigur esunnan cu tin entrada abou den nos pueblo, ta esunnan cu mas ta wordo perhudica y confronta cu situacionnan cu nan no a spera di pasa aden.

Na momento cu politiconan cana den pueblo y priminti solucionnan sin cu  nan lo tuma medida, pueblo ta confia y kere den e promesanan aki pero gabinete Wever Croes a haci net lo contrario, birando lomba pa su propio promesanan y presionando pueblo pa duna gobierno placa pa motibo cu e gobierno aki no tin vision y no tin nocion di e rumbo cu e kier sigui.

E pakete di medida cu a drenta na vigor dia prome di juli ultimo, lo produci casi 130 miyon florin cu ta placa cu ta sali for di cartera di nos hendenan, sin cu ainda tin un bista kico gobierno kier haci cu e placa aki ya cu ainda no tin un indicacion concreto unda e gobierno di coalicion kier bay corda pa yega.

 

Loke nos ta mirando den ultimo dos simannan cu e pakete di medida a drenta na vigor, ta cu pueblo no sa mas kico e tin cu paga, cuanto e tin cu paga y si loke e ta pagando na aumento di BBO y BAZV, ta hustifica.

Un situacion cu nos di fraccion di AVP sigur a anticipa ya cu for di momento cu gobierno manda un ley di e magnitud aki pa  parlamento atende y aproba, poniendo presion pa e pasa den menos cu cinco dia, ta mas cu claro cu esaki lo transforma su mes den e monster cu el a bira pa pueblo na e momentonan aki.

No tabatin dialogo, no tabatin analisis adecuado haci, no a prepara pueblo den e forma corecto caminda unicamente nos por a scucha un minister di finansa declara cu esaki lo ‘priki un tiki so’ pero e seriedad cu mester a hinca tras di e ley aki, nunca a existi.

A duna parlamentarionan dos dia pa studia e ley, gobierno no a clarifica y tampoco a contesta  tur pregunta cu a wordo haci di parti di fraccion di AVP mientras cu tratamento di e ley a bira mas tanto un discusion politico di parti di e fraccionnan cu ta sostene gobierno, sin cu  nan a duna atencion na e consecuencianan cu introducion di e medida aki lo bay tin riba interes di nos pueblo.

Den ultimo dianan varios intento ta wordo haci pa  splica un situacion cu no por wordo splica, ta trata na hustifica cosnan cu no tin hustificacion pero na final ta pueblo lo keda e victima di un pakete di medida cu a wordo tuma den forma ad hoc y cu awor ta pueblo ta wordo perhudica formalmente,” Parlamentario Michael Lampe ta splica.