Home Politics Parlamentario Richard Arends Pueblo ta birando victima di un ley di...

Parlamentario Richard Arends Pueblo ta birando victima di un ley di medida sin preparacion

 

E tempestad cu gobierno di coalicion a crea pa trata na hustifica introduccion di un pakete di medida, ya a pasa bay y den pueblo ya caba ta biba e siguridad cu tur loke gobierno a haci algun luna atras, ta di crea un excuus pa financia nan gastonan excesivo. 

Un plan cu ainda ningun hende sa kico e ta contene y kico e lo bay bira, mucho menos ki interes e lo tin pa pueblo, caminda no solamente a introduci un aumento di BBO y BAZV, pero hunto cune a implementa un aumento di accijns riba gasolin, lo elimina reparatietoeslag di pensionadonan entrante prome di januari y lo bay cobra pa recogemento di sushi.

Parlamentario Richard Arends a mustra cu ta e unico motibo di e medidanan aki.

 

“E transicion pa mas impuesto indirecto sin cu tin compensacion debido pa esunnan di mas vulnerabel,  tin repercusion hopi pisa pa esunnan di mesun recurso. Durante ocho aña Gabinetenan Mike Eman a hiba un maneho socio-economico caminda cu a sa di aumenta e poder di compra cu 11% pa esunnan cu un entrada di menos di 2500 florin pa luna. 

 

E pakete di medida cu a drenta na vigor dia prome di juli ultimo, ta mishi den cartera di famianan y ta un ley caminda e compensacion no ta completo, un ley caminda pensionadonan ta wordo bisa cu nan poder di compra ta wordo mehora dor di reduccion di prima di AZV pero di otro banda ta nan mes tin cu financia esaki ya cu nan ‘reparatietoeslag’ ta bay cay afo y no tin compensacion pa esunnan den onderstand ni tampoco ambtenaar nan.

Fuera di tur esaki ta aumenta e ‘cost of doing business’ na Aruba y ta perhudica e competividad riba nos mercado y a expresa nos preocupacionnan pero e ley aki tambe ta aumenta e costo di haci negoshi aki na Aruba.

Tur esaki ya caba por sinti su efecto caminda e kehonan ta enorme ya cu ningun hende y pa tristo cu e por zona, ni gobierno a spera e impacto cu esaki tin caba den apenas dos siman cu e ley ta na vigor.

Nos a mustra cu e ley di BBO lo tin implicacion serio pa loke ta trata servicionan financiero, tambe acuerdonan di seguronan comercial manera seguro di auto y di biahe pasobra ta bay cobra BBO y BAZV mas halto. Esaki ta yega na e empresario chikito y ta yega na esun cu ta traha independientemente.

Loke ta tumando luga na e momentonan aki ta mas cu logico y nos di fraccion di AVP a cuestiona e forma con e ley aki a wordo regla ya  cu riba un diahuebs anochi e ley a yega Parlamento y ya caba diamars anochi e ley a wordo aproba, despues cu nos fraccion di AVP a bay cerca Gobernador caminda nos a haci denuncia pa e proceso aki.

AVP a mustra cu esaki ta un ley cu ta cambia 13 ley, un embergadura masha grandi mes, sinembargo NO a duna Parlamento suficiente tempo pa por studia esaki y obviamente ta un ley di medida cu a wordo introduci ciegamente sin ningun conseho, sin ningun consulta y sin ningun proyeccion macro economico pa su efectonan.

Loke awe tur hende ta sinti den pueblo, e  cantidad di reclamo y criticanan cu tin den apenas mita di luna, ta algo cu nos a anticipa y a spierta gobierno di esaki y awe ta pueblo ta sinti e efecto di e falta di conocemento aki di gobierno,” Parlamentario Richard Arends a declara.