Matadera – Dialuna anochi 10:25, polis y ambulance a bay Matadera pa un accident.
Tawata trata di un accident entre un auto y un brommer, esaki a sosode na altura di Cactus Apartment.
Na yegada polisnan ta topa cu un Toyota Rav color blanco y un brommer benta su dilanti.
Parti patras di e auto, e motociclista herida tawata riba caminda drumi.
E agentenan policial a constata cu e motociclista a ricibi sla na cara y cabes.
Segun nos a compronde na e sitio, ta cu e dama tras di stuur di e Toyota lo a hala of a bay pa bira na su man robes, net na momento cu e brommer tawata biniendo.
Debi na e impacto fuerte e motociclista a bay cay patras di e Toyota Rav. E polisnan na e sitio tawata papia cu e motociclista y tawata tene abou pa e no lanta.
Na yegada di ambulance, e personal di ambulance a controle y a bay cuminsa prepar’e pa transporte pa hospitaal, pero na dado momento e motociclista a lanta para y tawata sangra pa nanishi y tambe, probablemente e lo a haya un herida patras di cabes.
Ora cu personal di ambulance y demas persona na sitio tambe na bise cu e mester bay hospitaal pa un tratamento medico mas avansa mirando e heridanan cu ela ricibi, e motociclista a nenga. Varios biaha a puntr’e y a consehe pa bay hospital, paso e mester bay pa nan cose un corta cu ela haya, ela keda para ariba cu e no ta bay hospital.
Polis di trafico tambe a papia cune y a splike tur cos, asina mes ela keda para ariba cu e no ta bay hospital.
Na e sitio despues di un rato ela cuminsa saca hopi, esaki ta un indicacion cu e lo por a haya un hersenschudding pero asina mes e no kier a bay hospital.
No a keda e personal di ambulance nada otro, di sigui pa nan siguiente asistencia, lagando e motociclista atras cu no tawata desea niun sorto di asistencia.