Diasabra algo prome cu 1’or di marduga, durante patruya Kust Surveillance ta topa cu un boto cu dos motor y cu varios tanki gasolin, riba e beach di Daimari y esaki ta confirma cu mester tabata tin ilegalnan cu lo a subi tera basta rato pasa.
Mesora a pidi cooperacion di un patruya di Santa Cruz pa tira bista den becindario di Daimari pa mira si nan por topa cu cualke persona. E patruya di Santa Cruz enberdad a bay tira bista den e area di Daimari pero no a topa cu niun persona mas.
Diasabra pa mas o menos 9’or mainta polis ta haya un informacion cu tin hende ta hortando na e boto, mesora a manda un patruya y na yegada nan a bin constata cu desconocidonan a bay cu un motor for di e boto. E patruya di Santa Cruz a keda na e sitio te ora cu Kustwacht bin buska e boto.
Mirando e rastronan cu tin riba e tera muy probablemente esnan cu a yega riba e boto aki lo mester a wordo transporta cu autonan 4×4 of ATV’s. Cuanto persona y kiko tur nan a trece sigur no ta conoci.
E lancha aparentemente lo ta yama El BENDNV AP y ta procedente di Las Piedras. No ta trata di un boto hopi grandi y sigur no por transporta hopi persona. Kiko nan lo a trece tera, cu nan a move asina liher for di e sitio, ta keda e pregunta.
E entradanan ilegalmente for di Venezuela ta keda pasa y semper nan ta drenta net na momento y unda no tin control, semper nan ta buska un buraco pa nan por burla di autoridad. E preocupacion mas grandi ta kiko tur nan ta trece, den pasado a yega di intercepta boto cu ilegalnan transportando droga, arma y animalnan prohibi.
Loke sigur ta di cuestiona con por ta posibel, cu pa un entrada ilegal na Aruba ta prefera di perde un boto, cu dos motor y varios tanki gasolin, especialmente analisando e situacion na Venezuela, esaki ta confirma cu loke nan a bin cune of e entrada ilegal na Aruba aki tin mas balor cu e boto cu dos motor.
Cuanto persona, kendenan a drenta Aruba y kiko tur nan lo por a trece cu nan ta keda un misterio pa Aruba.
E boto aki sigur tambe lo ta un mas den e colecion di botonan laga atras na nos costa, cu ta wordo warda riba e tereno di Marinierskazerne.