E gobierno actual di Gabinete Wever-Croes a hereda un situacion financiero desastroso na final di 2017 cu un debe nacional cu a alcansa un record di 4.2 biyon florin. Echo ta cu poco poco un gran parti di comunidad, sindicatonan, gremionan y CAft tambe a cuminsa realisa e embergadura di e debe y nan ta hopi preocupa pa e situacion alarmante aki y a yega te hasta asina leu cu Secretario di Estado Hulandes sr. Raymond Knops a reconfirma den un declaracion televisa cu ultimo 8 añanan di Gabinete Eman e debe nacional di pais Aruba a crece di 40% te cu 90% y a yama esaki cu tur su rason “ZEER DRASTISCH”.
AVP kier parti e dolor sam sam
E declaracion ultimo aki di sr. Knops siguramente no a cay den bon tera cerca e politiconan di AVP y nan a instrui nan siguidornan pa sigui twist tur informacion, sigui manipula y lansa mentira door di bin e biaha aki cu e ponencia cu e debenan desde 1986 te cu 2017 a ser crea tanto pa e gobiernonan di AVP y MEP y cu e debenan aki ta core den un porcentahe di 50-50, esta cu tur dos partido ta mesun culpabel pa cu e crecemento drastico di nos debe nacional. Na Hulandes tin un dicho aplicabel pa AVP cu ta bisa cu “gedeelde smart is halve smart”, esta door di parti e dolor sam sam, esaki lo cay menos pisa pa AVP y nan lo no sinti nan mes nan so pa cu e dolor aki. Pues asina aki partido AVP den nan desesperacion a inventa y kier bende pueblo e mentira di 50-50 porciento di nos debe nacional crea pa AVP y MEP durante di e ultimo 32 añanan.
Debenan: AVP 70% – MEP 30%
Pa comproba un biaha mas e mentira cu AVP a inventa, adhunto un tabel den cual por mira con e debenan a aumenta desde 1986 te cu 2017 tanto bao di e gobiernonan di AVP como di MEP. Asina nos por mira cu e aumento di e debe nacional bao di AVP a suma na total 2918 miyon florin y bao di MEP esaki tabata 1277 miyon florin. Pues den porcentahe e debenan crea bao di gobiernonan di AVP a suma na 70% y bao di e gobiernonan di MEP na 30%.
Mester remarca si cu e aumento di e debe bastante halto di 725 miyon florin bao di gobierno di MEP den e periodo di 2002-2009 pa gran parti ta atribui na e desaster cu Gabinete Oduber a hereda na 2001, esta tur e debenan di e proyectonan fracasa y di fantasma di gobierno di AVP: Garantianan di SACE (206 miyon dollar), Radisson (120 miyon florin), Race Track (50 miyon florin), Radar (23 miyon florin), Plan Desaroyo San Nicolas (52 miyon florin), Trias (36 miyon florin), Fuentes (43 miyon florin) etc. Tur e supuesto proyectonan aki a yega na un total di casi 700 miyon florin sin ningun beneficio pa pueblo pero cu Gabinete Oduber mester a paga.
Pues un biaha mas partido MEP mester a desenmascara un otro mentira di AVP y mediante di e tabel adhunto cu ta basa riba cifranan oficial di Banco Central claramente tur hende cu sano huicio por comproba pa nan mes ta cual partido realmente a desgracia e pais aki. Kico lo bay ta e siguiente mentira di partido AVP den direccion di MEP?