ORANJESTAD, Aruba – Dr. Horacio E. Oduber Hospital a celebra cu hopi orguyo graduacion di 17 studiante cu a gradua pa por traha como Emergency Nurse, ICU Nurse y den departamento di Interventie Cardiologie. Hospital ta contento cu e logro di nos nursenan awo specialisa, mirando cu banda di nan trabou, nan famia y bida diario nan a caba un estudio super pisa cu ta rekeri hopi dedicacion.
Pa prome biaha Hospital tin nurse di ICU cu alabes a caba e estudio di Interventie Cardiologie. Hospital a cuminsa 3 luna pasa cu Interventie Cardiologie, den cual ta rekeri nursenan specialisa. E nursenan a gradua den 3 categoria di specialisacion, fuera cu nan tin nan base y añanan di experiencia, awo nan a termina nan specialisacion den Interventie cardiologie.
Director di Cuido di Dr. Horacio E. Oduber Hospital, sr. Ezzard Cilié, a enfatisa cu e specialisacion aki ta a base di e contract y acuerdo cu e universidad VUmc di Hulanda, conoci pa ta un di e miho nan pa brinda educacion den e tipo di specialisacion asina. VUm a supervisa henter e trayecto aki, a train y a guia e studiantenan te na e resultado grandi aki. Den e grupo tin algun nurse cu ta traha na IMSan, cu a cera cabes cu Hospital pa educa nan nursenan na e mesun nivel. E union aki ta traduci den mas man pa yuda carga e gastonan den un forma mas responsabel. Tambe a tin dos nurse di Boneiro cu a participa na e estudio aki na Aruba, mirando ya e bon cooperacion cu HOH tin cu Boneiro.
Sr. Cilié ta orguyoso di e grupo aki pasobra, fuera di nan trabou normal y nan famia, nan a logra pone tempo un banda pa por a sigui studia. Esaki ta demostra cu aunke e opleiding no tabata facil na nivel di HBO ta rekeri hopi disciplina y hopi inversion di e candidato mes p’e por logra. E Director di Cuido di Hospital ta contento cu e logro, pasobra tin scarsedad di nursenan specialisa y e ta contento di a logra convence nos mesun nursenan local pa sigui studia, sigui prepara nan mes, sigui desaroya, pa por sigui brinda cuido na pashentnan, pero awor den forma mas profesional y specialisa.