SNBA a tene su acostumbrado Townhall Meeting na Sta Theresita Center, cu a conta cu presencia di diferente instancia y comerciante cu interes directo den San Nicolas. Na e ocasion aki e asociacion a presenta nan vision pa cu San Nicolas cu e titulo “National Transformation Plan”. Minister Chris Romero tabata presente como invitado, y hunto cun’e Minister Andin Bikker y e experto riba e area di Ferry, sr. Ton Janssen.
A papia di e plannan di Gabinete Wever Croes pa San Nicolas, cual tin e Fast Ferry como enfoke principal y ta parti di e vision di SNBA pa San Nicolas.
Den e anochi informativo y participativo aki, e publico presente a haya oportunidad pa formula pregunta, comparti opinion y trece nan preocupacionan dilanti.
Por a nota cu e sentimento general ta cu San Nicolas ta na e momento oportuno pa haya un boost den su economia y como tal mester cu e cambionan necesario y mereci pa P’ariba di Brug por florece. Den e ultimo decadanan San Nicolas su desaroyo a wordo poni un banda y esaki ta algo cu no lo sigui pasa bou di Gabinete Wever Croes.
Minister Romero ta comprometi pa realisa e proyecto di e Fast Ferry na San Nicolas y apoya e vision completo cu SNBA tin pa P’ariba di Brug. E ‘National Transformation Plan’ presenta pa e asociacion ta cuadra completamente cu e vision di Gobierno pa San Nicolas. Gabinete Wever Croes lo traha conhuntamente cu SNBA pa asina logra pone San Nicolas bek ariba pia como e ciudad cultural di Aruba.