Lider di delegacion di parlamentarionan di Aruba pa asuntonan di Reino, mr. Juan Thijsen, y vocero di e delegacion, sr. Rocco Tjon, MBA a manda un carta pa nan coleganan Hulandes Pechtold y Ganzevoort.
MOTIBO DI E CARTA
18 di juni e secretario di estado sr. KNOPS a contesta e peticion haci door di e parlamentarionan Hulandes Pechtold y Ganzevoort. E peticion ta trata e “geschillenregeling”, den cual nan ta puntra KNOPS pa entrega e ley cu ya caba tin conseho riba dje prome cu November di e aña aki na Tweede Kamer. E carta aki a wordo manda den nomber di delegacion Arubano tambe.
KICO TA E GESCHILLENREGELING?
E “geschillenregeling” ta un ley cu ta regla cu un instancia imparcial ta dicidi riba un impase entre paisnan den Reino. Reglanan di bon gobernacion (deugdelijkheid van bestuur) ta conta den un estado di derecho. No solamente pa cada pais den Reino esaki ta conta, pero tambe den e relacion entre e paisnan esaki mester conta. Actualmente ta asina cu Hulanda, por medio di e coseho di minister di Reino, ta dicidi si mester interveni na Aruba, Corsow of Sint Maarten. Si e pais en cuestion no ta di acuerdo cu e decision, ta e mesun conseho di minister di gobierno aki ta dicidi si e apelacion ta valido of no.
PROCEDURA DI GESCHILLENREGELING
E procedura actual tin mas cu 8 aña andando y pa e motibo aki e delegacion di Aruba no ta acepta cu lo entrega un ley nobo.
Tambe no mester lubida e mocion cu a wordo entrega door di e parlamentario Hulandes van Laar, cu a wordo aproba den Tweede Kamer na 2016 cu un mayoria. E mocion ta encera cu e instancia cu mester dicidi ora di un geschil mester ta: “onafhankelijk”, su decision mester ta “bindend” y e mester trata juridische geschillen, por ehempel interpretacion di toepassing Statuut di Reino.
Y ta pa e motibo aki no ta acepta e falta di transparencia di sr. KNOPS den e asunto aki y ta spera cu sr. KNOPS lo sa di respeta e peticion cu a wordo haci na dje door di e delegacion Hulandes, den nomber di tur delegacion di Reino.