ORANJESTAD – E hecho cu CAFT a duna e seyo realistico na Preupuesto 2018 ta debi na e forma deligente cu Gobierno a traha pa asina por yega na un Presupuesto supletorio pa 2017 y un Presupuesto pa 2018. E maneho di gobierno ta pa recobra e credibilidad financiero di pais Aruba, pa asina nos pais por sigui haya e inversionnan necesario. Como inversionista bo mester por confia cu bo inversion ta den bon man y cu e gobierno ta traha pa mantene un finanzas pubico manehabel pa no mester haya sorpesa cada aña.
Gobierno a tene cuenta cu tur e recomendacion y preocupacion vocifera pa CFT riba Presupuesto 2018. Den diferente carta a duna splicacion y a manda informacion extra pa asina por acerta na CFT, cu e contenido di Presupuesto 2018 ta cuadra cu realidad. Esaki a pone cu diabierna ultimo CFT a duna un seyo realistico na Presupuesto 2018. E notica aki fuera di ta trece e trankilidad necesario cu gobierno tin mester pa por goberna, e ta trece tambe e trankilidad y confiansa pa inversionistanan por inverti den nos economia.
Gobierno di Aruba a scoge pa tuma e pasonan necesario pa asina pais Aruba por recupera su credibilidad financiero. Minister Xiomara Ruiz-Maduro a trece dilanti cu e pasonan y decisionnan cu ta wordo tuma no tur ora ta popular, pero tur sigur ta sumamente necesario pa e pais aki. Si awe nos no asumi nos responsabilidad, mayan esaki lo tin su consequencia grave pa nos propio yiunan.