Manera ta conoci cu CAFT a bishita comision fiho di finansas publico y economia den Parlamento y a discuti ariba puntonan di e presupuesto 2018 di Pais Aruba. Gabinete Wever Croes I a cumpli cu recomendacionnan di CAFT pa 2018 y ta pone un comienso nobo pa loke ta trata presupuestonan realistico pa Pais Aruba.
Sinembargo esaki no lo bay sin su retonan. E politica di pauwies di sacamento di potret, haci netchi y lombra pluma cu Gabinete Eman a hiba, a trece un debe astronomico cu ne. Inversionnan bashi den propaganda, personalidadnan internacional, y e producto AVP a wordo bendi na un prijs halto cu no a trece placa bek den caha pa Pais Aruba. Un promocion sin limite pa por a mantene un gran cantidad di voto, lubidando e responsabilidad pa laga un Pais fuerte pa e generacion cu ta sigui nos.
Gobernacion ta e arte pa bo mehora di e pasado, y aplica den presente locual cu bo kier cosecha den futuro. Si nos mir’e asina, Gabinete Eman a laga atras un cosecha amargo pa e proximo generacion.
GRADUS
Presidente di CAFT, sr. Raymond Gradus a menciona publicamente cu tur hende por comprende cu pa cada ciudadano cu lo nace, tin un debe di 40,000 florin como herencia riba su cabes. Mas ainda cu e medida di pensioen cu a pasa e peso a bira mas grandi pa carga pa e ciudadano pasobra e tin di carg’e pa mas tempo tambe. E propaganda pa laga kere cu crea debe lo a stimula economia no a funciona na fabor di comunidad, segun Gradus.
Mas bien esaki tawata e formula pa no carga responsabilidad, pero si mantene un reputacion di “great guy” cu tur gremio, prensa y sindicatonan compremeti y sostenedornan. Pa duna bo yiu mangel tur dia djis pa e no rabia cu bo, no ta haci cu bo ta ‘great’, mas bien bo ta aumentando e posibilidad di perhudica bo yiu su futuro.
Awe nos ta biba den carni propio e consecuencianan cu e politica di pauwies a trece cu ne. Un filosofia cu no a duna resultado specialmente no den e tipo di economia di Aruba. E realidad y resultado final ta, cu e recibo tin di wordo paga!
Otro punto cu a ser enfatisa den nos reunion cu CAFT ta cu AVP a papia di crecemento den empleo, pero a ehecuta esaki na e manera di mas facil, y cu hopi riesgo y no sostenibel cu ta existi. A scoge pa manipula un crecemento cu aumento di e gasto di personal di e aparato gubernamental di 308 miyon pa 380 miyon florin y a mercadia esaki como un crecemento laboral.
Mas bien esaki tawata patronahe politico di cantidad di coordinadornan cu a mantene nan mes ocupa cu e agenda politico di Gabinete Eman solamente y no necesariamente a nifica un ayudo directo pa Pais Aruba den su totalidad.
GABINETE NOBO
Loke Gabinete Wever Croes I a logra den 7 luna di gobernacion tawata pa presenta un vision y direccion pa un finansas publico duradero y realistico si nos ta mira e contesta di CAFT ariba presupuesto 2018. E vision di e gabinete ta premira cu lo tin un bahada di debe den 2019 y pa 2020 lo papia di un surplus cu lo crece pa 1% pa 2021. E vision financiero aki lo guia Aruba den un direccion unda cu substancialmente lo rebaha gastonan crea pa Gabinete Eman, y crea espacio pa por goberna mas responsabel bahando interesnan halto acumula door di añanan tras di lomba.
E reto pa e gabinete nobo aki ta pa pone un paro na e gastonan di politica di pauwies, y no sigui crea debe cu tin di wordo pasa pa e generacion cu ta sigui nos, pero tambe tin di sondea entradanan nobo pa Aruba. Den tur esaki sigur for di Parlamento nos lo ta para firme pa defende nos Pueblo y percura pa e proximo generacion sinti un cambio real pasobra a yega tempo pa nos stop di haci wega cu cos serio!