ORANJESTAD, Aruba – 24 di Juni 2018: Anualmente tin un cantidad halto di empleadonan di Dr. Hospital E. Oduber Hospital cu ta celebra añanan di servicio. E aña aki tabatin un grupo mas grandi cu normal. Hospital a celebra 880 aña di servicio, parti entre 48 empleado cu a bini hunto cu nan famia pa celebra e 12.5, 25 y 40 aña di servicio. Alabes a hiba palabra di elogio y gradicimento na empleadonan cu a dedica nan bida na Hospital y awo ta bay disfruta di un dushi pensioen. E atardi aki tabata yena di alegria y gradicimento na tur cu ta trahando pa hopi aña.
A parti e grupo di 2018 den dos celebracion pero asina mes el a keda grandi, asina Charlaine Alexander-Huntington, Manager di comunicacion di Hospital, a duna di conoce. Un grupo di 16 empleado a celebra 12.5 aña di servicio, un grupo di 13 a celebra 25 aña, un colega 35 aña y tambe 8 colega 40 aña di servicio. Di algun di coleganan cu a celebra aña den servicio na mes momento ta bay disfruta di nan pensioen y e grupo di pensionado ta 13 colega. Pa por a celebra e grupo grandi di añanan di servicio, Hospital a cuminsa prepara algun luna atras. Alfinal a yena e sala grandi di Hilton completamente yen mirando cu tur cu ta traha cu esnan celebrando tabata kier ta presente pa e momento historico di ricibi nan pin.
Director di Cuido, sr. Ezzard Cilié, y tambe Director Financiero di Hospital, sr. Theo de Kool hunto a colabora y haci entrega di e pinnan na cada empleado celebrando. Na final di entrega di pin a pasa un video cu mensahe pa colega di colega recordando momentonan bunita den nan trayecto na Hospital.
E celebracion a bay den un ambiente ameno, cu hopi alegria y colegialidad. Hospital ta gradici e empleadonan pa nan añanan di servicio, pasobra cada aña di trabou ta contribui na un miho cuido. E palabra Danki ta keda chikito pa tur loke boso cada uno ta significa pa haci e estadia of bishita di nos pashentnan uno positivo.