Willemstad – Durante su bishita na Corsou Colegio di supervision financiero di Corsou y Sint Maarten (Cft) a indica cu den ehecucion di e presupuesto mas vision y un miho maneho ta necesario. E situacion financiero di Corsou y e riesgonan relaciona cu ne ta motibo di hopi preocupacion cerca Cft. Pa 2018 mester compensa minimalmente un di tres parti di e deficit provisional di ANG 113 miyon di 2017 y tambe mester cambia direccion di e efecto structural di e deficit ey. Pa tal fin Gobierno entretanto a tuma un serie di medida cu a incorpora den e modificacion di presupuesto di 2018, cu Parlamento mester aproba ainda. E prome reportahe di ehecucion di 2018 no ta mustra suficientemente cla ta cua ta e efecto di e medidanan tuma. Di e reportahe di ehecucion ta sali na cla si cu pa algun di e riesgonan ya awor caba medida adicional ta necesario pa evita un deficit nobo na 2018. Cft a pidi Ministro, entre otro, pa prome cu dia 11 di juli proximo mustra claramente ta cua ta e efecto cu e medidanan pa baha gasto y e medidanan pa aumenta cumplimento cu impuesto tin. Pa tal motibo a pidi explicitamente pa presenta medida pa por enfrenta posibel contratiempo y efecto di riesgo.
Durante su bishita Colegio a hiba combersacion cu Gobernador, Conseho di Ministro, Ministro di Finansa, Comision Financiero di Parlamento y Director y Supervisor Ministerial di HNO. Mañan tin un reunion cu Controlaria General.
Resultado di e medidanan compensatorio ta necesario pa efectua e ahustenan
Segun e informacion mas reciente, e deficit provisional di 2017 ta alcansa ANG 113 miyon. Di acuerdo cu e presupuesto di 2018, lo compensa e aña aki ANG 48 miyon cu varios medida. E prome reportahe di ehecucion di 2018 no ta contene suficiente informacion tocante e resultado di e medidanan ey, pero ta mustra si cu impuesto pa e prome kwartaal di 2018 ta decepcionante. Durante e bishita anterior Cft a insisti pa presenta reportahe cada luna pa por mira claramente progreso di e presupuesto en general y compensacion di e deficit en particular. Esaki ta necesario pa toch por haci e ahustenan necesario na tempo den un aña cu presupuesto ta bou di presion y den cua tin poco espacio pa absorba e contratiemponan. Cft a señala Ministro cu te aworaki no a ilustra cu claridad con Corsou ta eherce control pa mantene realisacion denter di e liñanan di e presupuesto. Sin medida adicional ta parce inevitabel cu pa fin di 2018 lo tin un deficit nobo. Por lo tanto Cft a pidi Ministro pa prepara medida pa enfrenta e posibel contratiemponan ey. Ademas Cft a menciona e importancia di logra un presupuesto balansa den cuadro di e crecemento economico. Inversionista ta balora finansa publico stabiel, pasobra e ta contribui na un clima di inversion confiabel. Ademas fiamento di placa bou di condicion faborabel via Hulanda ta posibel solamente den caso di un presupuesto balansa.
Traduci analisis di riesgo den e presupuesto di 2018
Varios riesgo tin un impacto significativo riba ehecucion di e presupuesto di 2018, di cualnan algun ya ta materialisando. E riesgonan pa loke ta Sehos, HNO y varios dividendo pendiente di entidad gubernamental por tin un impacto significativo riba presupuesto y mester controla nan activamente. Tambe ta existi riesgo asocia cu implementacion di e medidanan pa reduci gasto, e medidanan pa aumenta cumplimento cu impuesto, recaudacion di impuesto y e situacion rond di e refineria. Por lo tanto, na cuminsamento di e aña aki Cft a pidi Ministro pa elabora un analisis di riesgo. Despues di a ricibie, Cft a pidi pa elabora y fundamenta un serie di punto mas detayadamente. Lo mester traduci e resultadonan di esey den e presupuesto di 2018.
Continuacion
Ta toca Gobierno awor pa tuma accion a corto plaso pa loke ta e puntonan debati. A pidi Ministro pa informa Cft prome cu dia 11 di juli proximo tocante elaboracion y progreso di e consehonan y preguntanan ainda pendiente. Cft a declara cu esaki ta necesario pa haci e presupuesto completo, suficientemente transparente, ordena y controlabel, di conformidad cu e Ley di Reino di supervision financiero.
Ultimo bishita di e miembronan di Cft Sybilla Dekker y Maria Plantz
E bishita aki tabata tambe den cuadro di despedida di e miembronan di Colegio Sybilla Dekker y Maria Plantz. Sra. Dekker ta tuma despedida entrante dia 1e. di juli di e aña aki. E tabata miembro di Cft for di den zomer di 2012. Sra. Sybilla Dekker tocante su periodo den Cft: “Mi a experencia e colaboracion cu Corsou como constructivo y mi ta spera cu e desaroyo economico – basa riba finansa publico sostenibel – lo ofrece Corsou yen di oportunidad.” Pa Maria Plantz tambe esaki ta su ultimo biahe como miembro di Colegio, pa motibo cu entrante dia 1e. di october proximo a nomin’e como miembro di Raad van State pa Sint Maarten. Cft ta consisti entrante dia 1e. di juli 2018 di Raymond Gradus (presidente), Gregory Damoen (Corsou) y Henk Kamp (Hulanda). Pronto lo anuncia e sucesor pa representa Sint Maarten.