ORANJESTAD– Den e simannan tras di lomba a tuma luga eventonan di tanto Gobierno como tambe sector priva cu e topico di innovacion, acentuando e importancia di technologia. Team di innovacion di Gobierno, a inicia e prome evento di innovacion, ‘Innovation Summit’ pa yega na un decision den ki direccion Gobierno y como tambe pais kier bay cu e topico aki.
Parlamentario Setty Christiaans-Yarzagary ta considera hopi importante pa tin un vision y un plan di innovacion na unda cu Gobierno y su departamentonan por benificia di esaki. E Parlamentario ta duna di conoce cu prome cu el a bira Parlamentario, e mes a traha den un departamento di Gobierno y por bisa cu no mucho a wordo inverti den conocemento, training of ekipo pa motibo di, mayoria parti, placa pero tambe falta di conocemento di e materia y vision real.
E Parlamentario ta di e pensamento cu Gobierno mester aloca su placa miho posibel y inverti den innovacion na un manera eficiente mirando e situacion financiero precario. Pa e motibo aki, e Parlamentario ta di opinion cu e conferencia di innovacion aki tawata sumamente importante pa motibo cu un plataforma amplio a bin hunto unda entre otro a determina e area(nan) cu tin mas prioridad pa inverti prome.
Gobernante y Parlamento mester por yuda dirigi e pais den un direccion na unda, apesar di e posibilidadnan financiero limita, mester eleva e nivel technologico, paso mundo ta sigui draai y technologia ta sigui avansa. Riba e materia aki, segun e Parlamentario, sector di gobierno no tur ora por competi cu e sector priva riba diferente area. No obstante cu Gobierno ta duna servicionan diferente na un sector priva, ta sumamente importante pa nos keda ‘up to date’ den e parti technologico y innovativo. Sino, tin servicionan cu sector di gobierno por duna y cu sector priva tambe por duna pero logicamente no na e mesun nivel pa motibo di e descrepancia cu ta existi entre e dos sectornan.
Den e conferencia di innovacion, al igual cu otro seminario cu e Parlamentario a asisiti, a mustra diferente nesecidadnan y con e parti technologico y innovacion ta avansando y tambe a duna diferente tips cu por uza. E Parlamentario ta haya lamentabel cu un sector di gobierno no por uza e metodonan technologico y innovativo aki pa motibo cu ley tin ora no ta permiti pa haci cierto cosnan compara cu sector priva. Esaki tawata un tema cu Parlamento tawata tin cu e ekipo di innovacion na unda a discuti cu mester bin cambio di ley pa asina haci mas cos posibel den e sector di gobierno tambe.
Esaki ta bay un poco den linea cu e proyecto di SDG’s cu ta e metanan di desaroyonan sostenibel di Nacionnan Uni na unda cu tambe a conclui cu diferente ley mester wordo cambia of revisa pa por ehempel por tin miho intercambio y cooperacion di data. Pues tin leynan cu no ta permiti pa haci cierto trabounan mas eficiente of eficas, mirando cu leynan a keda anticua den e mundo moderno cu nos ta bibando aden, limitando e ora Gobierno di por opera na un manera mas eficiente y efectivo.
Parlamentario Christiaans-Yarzagaray a bisa cu e esencia di e conferencia di innovacion tawata cu e participantenan mes a duna nan opinion cua ta e prioridadnan cu mester awor aki y cua ta e aspectonan cu Gobierno por haci mas eficiente. Hasta pa economia por draai bek, tin mester di sistemanan technologico pa logra haci procesonan di trabou mas lihe y transparente. E proceso pa establece un negoshi ta dura largo y cu technologia e procesonan aki por bira mas agil.
“Participando na e conferencia aki, mi a conclui cu e ekipo di innovacion ta bezig den bon direccion mirando cu ta busca opinion di un plataforma amplio di tanto sector gubernamental como sector priva. Tin proyectonan na caminda cu tin necesidad di asistencia di parti di e team di innovacion, cual ta e intencion di Gobierno y e ekipo di innovacion cual ta di aplaudi. Pero dimes ta nos tarea tambe pa controla si financieramente esaki ta keda conforme e cuadro di ley,” segun Parlamentario Christiaans-Yarzagaray.