Den cuadra di temporada di horcan, Minister President Evelyn Wever-Croes dialuna mainta a reuni cu miembronan di Beleidsteam na Rampenbureau. Esaki ta e organo mas halto ora ta trata calamidad. E Beleidsteam tin un plan di calamidad cu ta inclui Training HUREX 2018.
Prome Minister a indica cu ya caba e departamento di Rampenbureau tawatin diferente reunionnan riba e tereno operacional. E reunion di dialuna mainta tawata un reunion pa sigura cu tur cos ta na ordo. E departamento ta bon prepara y informa cu un bon plan riba mesa cu sigur ta duna un trankilidad na Gobierno aunke cu nos tin e speransa cu Aruba lo no wordo afecta pa un horcan.
E mandatario ta duna di conoce cu e departamento ta bon ekipa pa informa e comunidad y trece conscientisacion pa tur ciudadano ta prepara pa un evento di un horcan y of mal tempo.
E departmento ta bon prepara cu training tambe y tin experencia riba e tereno aki. Durante horcan Irma na Sint Maarten aña pasa, e departamento a bay yuda y esaki sigur a sirbi como experiencia. Parti di e plan ta tambe pa busca voluntarionan y duna nan e training y informacion necesario.
E training cu ta wordo duna ta pa preparacion pa un horcan di categoria tres. Cu lo ta hopi devastador si esaki pasa na Aruba. Tin varios rekisitonan cu mester tene cuenta cu nan cu lo no ta facil. Lo tin cu interumpi cierto regla y proceduranan. Den caso cu Aruba perde awa y coriente mester ta prepara pa e pasonan cu lo mester tuma. E cuerponan concerni mester ta prepara pa salbaguardia e siguridad di nos pais como di nan mesun famia.
“Esaki ta e prome biaha cu mi ta sinta na final di un training asina. Mi ta sigur cu nan ta hopi bon prepara y esaki ta duna mi un trankilidad. Mi ta encursha tur hende pa haci preparacionnan necesario y busca informacionnan pa e temporada aki”, Prome Minister a duna di conoce.