Home Politics Cu e compromiso di pone atencion real na nan necesidadnan Minister...

Cu e compromiso di pone atencion real na nan necesidadnan Minister Chris Romero a reuni cu e chauffeurnan di autobus

 

Recientemente Minister Chris Romero a reuni cu un grupo di chauffeur di autobus. Specificamente a reuni cu e chauffeurnan cu ta core e ruta di Noord.

Di e manera aki e chauffeurnan a haya e oportunidad pa comunica directamente na Minister nan sugerencianan y preocupacionnan, pa asina hunto purba yega na solucionnan concreto pa e retonan cu nan ta enfrentando pa algun tempo caba.

 

Durante e reunion a sali na cla cu tin varios inconveniente cu a surgi y cu pa motibo di mal maneho y falta di accion pa soluciona nan, e situacion a empeora.

Minister Romero ta di opinion cu esnan cu ta traha den mundo di Transporte Publico mester wordo scucha y brinda nan e oportunidad pa trece dilanti nan puntonan, como cu nan ta esnan cu ta eherciendo e trabou riba un base diario.

 

E titular di e cartera di Transporte tabata hopi atento na tur informacion suministra di parti di e chauffeurnan di autobus. A papia di e capacidad maximio di autobus, diferencia den ‘wegenbelasting’, parada di autobus na Playa, maneho mas eficiente pa control riba autobus, entre otro topiconan.

Minister Chris Romero ta kere den dialogo y como tal e ta di pensamento cu sintando na mesa cu esnan concerni ta e manera mas proactivo pa logra cambionan positivo pa tanto e chauffeurnan di autobus, pasahero y tambe Gobierno di Aruba.
E reunion tabata uno fructifero y Minister Romero a compromete su mes cu e lo ta pendiente di tur necesidad y sugerencia cu e chauffeurnan di autobus lo por tin, pa asina mehora nan situacion actual.