Home Politics Minister Dangui Oduber treciendo turistanan!

Minister Dangui Oduber treciendo turistanan!

ORANJESTAD, Aruba – E prome 5 lunanan di 2018 tabata positivo pa locual ta trata turismo di nos pais. Aruba a yama bon bini na un total di 441,455 turista “stay-over” cu ta nifica un crecemento 1.6% compara cu e aña anterior. Si exclui Venezuela, e cifranan ta indica un aumento di 6.1% compara cu 2017. Pa luna di mei 2018 Aruba a yama bon bini na 85,430 turista “stay-over”, pues un crecemento di 5.5% compara cu 2017. Si nos exclui Venezuela, por wak un crecemento di 7.3% cual ta un total di 5,564 turista mas cu 2017.

 

Turismo “stay-over”

En comparacion cu aña 2017 pa locual ta trata turismo “stay-over” nos por wak cu e cantidad di bishitante nan procedente di Norte America den luna di mei a subi cu 8.7% cual ta nifica un aumento di 5,026 turista. Norte America ta representa 73.7% di turismo pa Aruba. Pa luna di mei, Merca ta aumenta cu 9.3% pues 5,158 turista mas cu 2017. Den e prome 5 lunanan di 2018 Norte America a trece 346.876 turista pa Aruba, cual ta un aumento di 7.3%.

Pa continente Latino Americano nos por wak un caida di 7.4% (944 turista menos cu 2017) den luna di mei. Y pa Venezuela e cifra nan ta indica un caida di 23.3% compara cu mei di aña pasa. Colombia a baha cu 8.3% y Brazil a aumenta cu 11.8%. Latino America ta representa 13.9% di nos turismo.

Pa Europa cifranan ta indica un caida di 5.5% den luna di mei compara cu 2017. Turista nan procedente di Hulanda ta aumenta cu 15.8% cu ta un total di 3,364 turista. Alemania a aumenta cu 70.1% pa un total di 636 turista). E continente Europeo ta representa 8.2% di turismo pa Aruba pa luna di mei. Pa e prome 5 luna, Europa a trece 32.350 turista pa Aruba pues 1.8% menos cu e mesun period di 2017.

 

Turismo crusero

Te cu mei 2018 Aruba a yama bon bini na 404,680 pasahero crucero. Esaki ta nifica un crecemento di 2.2% (8,780 pasahero mas) compara cu e mesun periodo di e aña anterior. Pa luna di mei 2018 Aruba a yama bon bini na 40,224 pasahero crucero pues 22.3% menos compara cu aña pasa.  Esaki ta debi principalmente na cancelacion nan inespera den luna di mei 2018.

Hotel

Segun cifranan di Aruba Hotel and Tourism Association, e ‘Average Daily Rate’ (ADR) pa luna di mei 2018 a aumenta cu 11.1% compara cu mei 2017, di USD 200.68 pa USD 222.94 na 2018. Pa locual ta e prome 5 luna nan di 2018, e ADR a subi cu 8.7% pues USD 292.91. E RevPAR a aumenta cu 8.9% di USD 168.98 na mei 2017 pa USD 184.06 na mei 2018. Te cu mei 2018 e RevPar a aumenta cu 11.9% compara cu e mesun periodo den 2017. E anochinan ocupa (ORN) pa camber a baha cu 1.9% pa mei 2018. Pa e prome 5 luna di 2018 ORN a aumenta cu 2.8%.

 

Economia

Di acuerdo cu Banco Central e asina yama ‘Tourism Receipts’, pa aña 2017 a contribui cu Afl. 3.078.5 miyon pa nos economia, cual ta un aumento di 6.5% compara cu 2016. Minister di turismo su vision ta pa percura pa trece turista nan di calidad pa nos pais.

Tur indicador a demostra di ta positivo pa e prome 5 lunanan di 2018. Apesar di e crisis na Venezuela, turismo di Aruba a sa di mantene su mes stabiel. Esaki ta ilustra cu turismo ta sigui contribui na economia di Aruba. Turistanan di calidad ta yegando Aruba y esaki ta cuadra cu e vision di Minister di Turismo.